यलया व्यापारीतय् इनाप
यल (सन्ध्या टाइम्स)/देशय् राजनीतिक गतिरोध अप्वया वंलिसे निर्धारित इलय् संविधान दयेके मफइगु व देशय् पुनःस्थापना जूगु शान्ति प्रक्रिया हे जोखिमय् लानाच्वंगु इलय् एनेकपा (माओवादी) पाखें आइतवाःनिसें न्ह्याकूगु आमहडतालं देय्या फुक्क हे ख्यः अस्तव्यस्त जूवनेत्यंगु खँय् सकस्यां ध्यानाकर्षण यायेत कुमारीपाटी जावलाखेल व्यापार संघं इनाप याःगु दु ।
संघया नायः पुष्परत्न शाक्यं बियादीगु उगु वक्तव्यय् छखे सरकारं छुं हे याये मफयाः अनिर्णयया बन्दी जुयाच्वंगु व मेखे माओवादीं यानाच्वंगु आन्दोलनं जनता झन् हे प्रताडित जुयाच्वंगु वास्तविकतायात मनन यानाः वार्तायात हे समस्या समाधानया छगू जक विकल्प तायेकाः थुकिया हे लिधंसाय् सहमति कायम यानाः जनतायात थ्व संकटपाखें मुक्त यायेत नं इनाप यानातःगु दु ।
