आम हड्तालया खुन्हुया न्हि / पोखराय् गोली चलेजुल
आम हड्तालया खुन्हुया न्हि नं एकीकृत नेकपा (माओवादी)या कार्यकर्तातय्सं देय्न्यंक सुथंनिसें प्रदर्शन याःगु दु । उखे थीथी पेशागत संघ संगठनतय्सं येँ नापं देय्या थीथी थासय् शान्ति र्याली पिकाःगु दु ।
पेशागत संघ संस्थातय्सं पिकाःगु शान्ति र्याली व प्रदर्शनकारीत दथुइ थीथी थासय् ल्वापु जुयाः न्हिच्छि हे तनावपूर्ण स्थित ब्वलंगु खः । पोखराया लेखनाथ नगरपकालिका भण्डारढीक क्षेत्रय् पिहांवःगु शान्ति र्याली व माओवादी कार्यकर्तात दथुइ जूगु ल्वापुइ प्यंगू राउण्ड गोली चलेजूगु दुसाः च्याम्ह घाःपाः जूगु दु ।
सुथय् पिहांवःगु शान्ति र्याली लिहांवनेत्यंगु इलय माओवादी कार्यकर्तातय्त नापलयेवं निगू पक्ष दथुइ अप्पां क्येकाः ल्वापु जूगु खः । अप्पां क्येकाः ल्वापु जुयाच्वंगु इलय् हे गोली चलेजूगु खः । गोली सुनां चले याःगु धइगु खँ पुष्टि मजुनिसां माओवादीं थःपिनिगु प्रतिकारय् कुहांवःपिंसं गोलीं क्येकूगु द्वपं ब्यूगगु दु । स्थितियात नियन्त्रणय् कायेत प्रहरीं छुं राउण्ड अश्रुग्यास क्येकूगु खः ।
निगू पक्ष दथुइ जूगु ल्वापुइ माओवादी कार्यकर्तात ईश्वरी रेग्मी, रमिला रेग्मी, नवराज पौडेल, हेमबहादुर तामाङ, रामबहादुर बयलकोटी, लक्ष्मण सापकोटा, खेमराज ओझा व सुमन अधिकारी घाःपाः जूगु दु ।
अथेहे येँ पिहांवःगु शान्ति र्यालीया सहभागी व माओवादी कार्यकर्ता दथुइ नं थीथी थासय् ल्वापु जूगु दु । थुकीया बारे थप बुखँ ब्वनेत थन क्लिक यानादिसं । -- शान्ति र्यालीइ माओवादी आक्रमण
उखे येँया जोरपाटीलय् थौं नं स्थानीयवासी माओवादीया प्रतिकारय् कुहांवःगु दु । स्थानीयवासी प्रतिकारय् वयेवं माओवादी कार्यकर्ता दथुइ ल्वापु जूगु खःसा स्थिति नियन्त्रणय् कायेत स्वःगु इलय् प्यम्ह प्रहरी घाःपाः जूगु दुसाः छम्ह स्थानीय लक्ष्मण तामाङ घाःपाः जूगु दु । माओवादी विरोध प्रदर्शनया झ्वलय् गणतान्त्रिक खेलकुद संघं येँया त्रिपुरेश्वरय् धा:सा: कराते व ताइक्वान्डो कासात याःगु दु ।
अथेहे वीरगंजया घण्टाघरया दक्षिण पाखे हिन्दू युवा संघया कार्यकर्ता व उत्तर पाखे माओवादीया कार्यकर्ता च्वनाः नाराबाजी यायेवं निगू पक्ष दथुइ तनावया स्थिति ब्वलंगु खःसां लिपा माओवादीं थःपिनिगु जुलुस पिथनेगु ज्याझ्वः स्थगित यायेवं स्थिति सामान्य जूगु खः ।
