माओवादीं हःता यात शान्तिसभाय् ब्वति कावःपिन्त

मदिक्क आम हड्ताल जुयाच्वंगु इलय् छखे माओवादी कार्यकर्ताया ब्वज्या जुयाच्वंगु दुसा मेखे 'शान्ति संविधान व राष्ट्रिय सहमति' धैगू मू नारा थ्वयेका थीथी व्यावसायिक व पेसागत संगठनं राजनीतिक सहमतिया निंतिं दवाव बिइत याःगु शान्तिसभालिपा स्वत:स्फूर्त रुपय् पिहाँवःगु र्‍यालीं शान्तिया कामना यानाः बन्द लितकायेत माग याना न्ह्याःवःगु खः । उद्देश्य लगभग छगूहे माओवादीं राष्ट्रिय सहमतिइ सरकार थःगु निर्णय धासें याःगु आन्दोलन मेखे राजनीतिक दल दथुइ सहमति कःघायेत दवाव बिइगु उद्देश्यं याःगु शान्तिसभा ।

तर नं शान्तिपूर्ण रुपं याःगु शान्तिसभा रत्नपार्क थ्यनेवं छकलं माओवादी कार्यकर्तां शान्ति र्‍याली हःता यात अले ल्वापूया स्थित ब्वलन । सुरक्षाकर्मीं स्थितियात नियन्त्रणय् कायेत न्हय्गः अश्रु ग्यास त्वतेमाल ।

माओवादीया धापू दु - शान्तिसभां माओवादीया आन्दोलनयात दबेयायेत स्वत । उकिं जिपिं प्रतिकारय् कुहाँवयागु खः ।

स्वत:स्फुत रुपं पिहाँवःगु शान्ति र्‍यालीइ माओवादीं हःता यायेवं रत्नपार्क भद्रकाली, सुन्धारा चोक तनावग्रस्त जुल । निखेरं पक्ष दथुइ ल्वापू जुइगु स्थिति ब्वलनेवं प्रहरीं अश्रुग्याँस त्वःतूगु खः । अश्रुग्याँस त्वःतेवं ल्हाःतय् कठि ज्वनातःपिं माओवादी तितरवितर जूगु खः ।

अथेहे शुक्रवाः सुथय् पाटन औद्योगिक क्षेत्रं बसन्तपुरय् जूगु शान्तिसभाय् ब्वति कायेत वःपिं सर्वसाधारणयात माओवादीं कुपुण्डोलय् हःता यात । सभाय् ब्वति कायेत वःपिं सर्वसाधारणतय्सं पार्टीया ध्वाँय मखु देय्या ध्वाँय ज्वनावःगु खः । शान्ति सभाय् ब्वतिकाःपिन्सं जिमित शान्ति माल धैगु नारा थ्वयेकूगु खः ।

माओवादीं चोक चोकय् शान्तिसभाय् ब्वति कायेत वःपिन्त लँय् पंगः थनाब्यूगु खः । यलं शान्तिसभाय् ब्वति कायेत वःपिन्त वाग्मतीताँय् पनाब्यूगु खःसा डिल्लीबजार क्षेत्रय् नं शान्ति र्‍यालीइ ब्वति कायेत वःपिन्त पनाब्यूगु खः । बिहीवाः तनावग्रस्त जूगु जोरपाटीं वःपिं सर्वसाधारणयात माओवादीं चाबहिलय् पंगु खः ।