माओवादीयात वार्ताय् वयेत सरकारया इनाप
आपूर्ति सहज यायेत सुरक्षाकर्मी परिचालन याइगु
एकीकृत नेकपा (माओवादी)यात थःपिनिगु आम हड्तालया ज्याझ्वः स्थगित यानाः वार्ताय् वयेत सरकारं इनाप याःगु दु । माओवादीया आम हड्ताल खुन्हु थ्यनेधुंकाः सरकारं नालेमाःगु प्रकृयाया बारे सहलह यायेत शुक्रवाः च्वंगु मन्त्रिपरिषद्या आकस्मिक बैठकं माओवादीयात लोकतान्त्रिक विधि व प्रकृयापाखें सहमतिलय् वयेत इनाप याःगु दु ।
अथेहे सरकारं सुरक्षाकर्मी परिचालन यानाः येँया आपूर्ति व्यवस्था सहज यायेगु निर्णय याःगु दु । बैठकं न्हिया न्हिथं उपभोग व मेगू अत्यावश्यक वस्तुया अभाव खनेदुगु धासें आपूर्ति सहज दयेकेत सुरक्षाकर्मी परिचालन यायेगु निर्णय याःगु खः ।
सूचना व संचारमन्त्री नापं सरकारया प्रवक्ता शंकर पोखरेलं माओवादी हड्तालया कारणं बजारय् न्हिया न्हिथं उपभोग्य वस्तु तकं अभाव जूगु गुनासो वःगुलिं सरकारं अज्याःगु निर्णय काःगु कनादिल ।
मन्त्रिपरिषद्या बैठकं खुम्ह महासेनानीत धर्मबहादुर बानिया, अरुण घले, दीपक कार्की, दीपकप्रकाश भारती, प्रकाशसिंह बोगटी व देबेन्द्रबहादुर मेघासीया म्याद निदँया निंतिं थप यायेगु निर्णय याःगु दु । अथेहे श्रीलंकाया राजदूत सुशीलकुमार अमात्ययात मालदिभ्सया नं गैर आवासीय राजदूत नियुक्त याःगु दुसा: जर्मनका राजदुत सुरेश प्रधानयात अष्ट्रिया, हंगेरी, चेकोस्लाभिया, पोल्याण्डया निंतिं गैरआवासीय राजदुत नियुक्त या:गु दु ।
अथेहे मन्त्रिपरिषद्या बैठकं डाफरया बन्दोबस्तीया समानय् नेपाल प्रहरीं या:गु घोटलाया सम्बन्धय् राज्य व्यवस्था समितिं गठन या:गु उपसमितिया निष्कर्षयात कार्यान्वयन यायेगु निर्णय या:गु दुसा: एम आई १६ हवाई जहाज न्यायेत न्याम्ह दुज: दुगु वार्ता पुच: नं गठन या:गु दु ।
