अमेरिकां हड्ताल लितकायेत इनाप

संयुक्त राज्य अमेरिकां एनेकपा (माओवादी)यात आम हड्ताल लितकायेत इनाप याःगु दु । अमेरिकाया दक्षिण व मध्य एसिया स्वइम्ह सहायक विदेशमन्त्री रोवर्ट ओ. ब्लेकं छगू प्रेस विज्ञप्ति पिथना आम हड्ताल लित कायेत वा स्थगित यायेत माओवादीयात इनाप याःगु दु ।

विज्ञप्तिइ हड्तालं जनताया जनजीवन कष्टकर जूगु प्रति चिन्ता प्वंकूसें हिंसाया घटना अप्वयेके मबित माओवादीयात सचेत याकूगु दु । राजनीतिक संवाद पाखें सहमति पिहांवइगु प्रति अमेरिका विश्वस्त जूगु धासें तसकं लचकता नालेत दलतय्त इनाप याःगु दु ।

अमेरिकां दलत दथुइ सहमति व सहकार्यपाखें वर्तमान राजनीतिकया गतिरोधया अन्त्य यायेत इनाप यासें बृहत शान्ति सम्झौता कथं न्हूगु संविधान निर्माण प्रक्रिया पूवंकेत नं दक्वं दलया नेतातय् सहमति यायेत इनाप याःगु दु ।