शान्ति र्यालीइ माओवादी आक्रमण
थीथी पेशागत संघसंस्थातय्सं ग्वसाःग्वःगु शान्ति सभा लिपाः थीथी थासय् स्वर्तस्पूर्त रुपं पिहांवःगु शान्ति र्यालीलय् माओवादी कार्यकर्तातय्सं आक्रमण याःगु दु । येँया रन्तपार्क, भृकुटीमण्डप, पद्मोदय मोड लगायत थासय् पिहांवःगु शान्ति र्यालीया सहभागी व माओवादीं कार्यकर्तात दथुइ ल्वापु जूगु दु ।
भृकुटिमण्डपय् शान्ति र्याली व माओवादी दथुइ जूगु ल्वापुयात नियन्त्रणय् कायेत प्रहरीं छुं राउण्ड अश्रुग्यास क्येकूगु खः । वयां छुं ई लिपा हे पुलांगु बसपार्कय् निगू पक्षय् दथुइ हानं ल्वापु जूगु खः । उकीयात नियन्त्रणय् कायेत प्रहरीं स्वंगू राउण्ड अश्रुग्यास क्येकूगु खः ।
शान्ति सभा लिपा शान्तिया पक्षय् नारावाजी यानाः थीथी लागा चाहिलेगु झ्वल् रत्नपर्काय् थ्यंगु र्यालीइ नं माओवादी आक्रमण यायेवं निगू पक्ष दथुइ ल्वापु जूगु खः । स्थिति नियन्त्रणय् कायेत प्रहरीं छुं राउण्ड हवाई फयर व अश्रुग्यास क्येकूगु खः । अन माओवादी आक्रमणय् लाना प्रहरी नायव उपरीक्षक शरद खत्री घाःपाः जूगु दुसाः माओवादी कार्यकर्ता ऋषि पण्डितया प्रहरीं ज्वंगु दु ।
उखे यलय् शान्ति सभाय् ब्वति कया लिहांवःपिंसं माओवादीं छय्लाच्वंगु छगः गाडीइ तोडफोड याःगु दु । सुरक्षाकर्मी अन स्थिति नियन्त्रणय् काये न्ह्यः र्यालीया सहभागी व माओवादी कार्यकर्ता दथुइ तनावया स्थिति ब्वलंगु खः ।
अथेहे स्वनिगलं पिने झापा, पोखरा लगायत थासय् नं पिहांवःगु शान्ति र्यालीइ ब्वति काःपिं व माओवादी कार्यकर्ता दथुइ ल्वापु जूगु दुसा: सुर्खेतय् उद्योग वाणिज्य संघं यायेगु धा:गु शान्ति र्याली माओवादी अवरोधया कारण स्थगित जूगु दु ।
