तनाव अप्वयेवं थीथी थासय् कर्फ्यु
एकीकृत नेकपा (माओवादीं) यानाच्वंगु आम हड्तालया न्यान्हुया न्हि थीथी थासय् बन्दकर्ता व उकीया प्रतिकारय् कुहांवःपिं दथुइ ल्वापु जूगु दु । ल्वापु जुयाः तनाव अप्वयेवं धनकुटा, हुम्ला व पर्वतया सदरकुमामय् स्थानिय प्रशासनं कर्फ्यु आदेश जारी याःगु दु ।
धनकुटाय् माओवादी कार्यकर्ता व युथ फोर्सया कार्यकर्ता दथुइ न्हिच्छि जूगु ल्वापु अझ मदिवं स्थानीय प्रशासनं सनिलय् न्हय्ता इलं निसें मेगू आदेश जारी मजुतल्ले कर्फ्यु आदेश जारी याःगु दु । प्रशासनं माओवादी कार्यकर्ता व युथ फोर्सया कार्यकर्तात सदरमुकाम व नापसंया क्षेत्रय् ल्वाभः सहित तैनाथ जुइवं स्थिति थप जटिल जूगु धासें कर्फ्यु आदेश जारी याःगु खः ।
उखे जिल्ला प्रशासन ज्याकू हुम्लां सदरमुकाम सिमिकोट बजारय् कर्फ्यु आदेश जारी याःगु दु । बिहीवाः बहनी निसें शुक्रवाः सुथय् खुताः इलय् तकया निंतिं अन कर्फ्यु आदेश जारी याःगु खः । माओवादीया कार्यकर्ता नाप कांग्रेस व एमालेया कार्यकर्तातय् ल्वापु जुइवं शान्ति सुव्यवस्था कायम यायेत कर्फ्यु आदेश जारी याःगु खः ।
अथेहे माओवादी व बजाः च्याकाः जूपिं दथुइ थौ न्हिच्छि ल्वापु जुइवं तनावग्रस्त जूगु पर्वतया कुस्माबजार क्षेत्रय् स्थानीय प्रशासनं कर्फ्यु आदेश जारी याःगु दु । प्रशासनं बिहीवाः बहनी च्याताः इलं निसें शुक्रवाः सुथय् प्यताःत्याः ई तक कर्फ्यु आदेश जारी याःगु खः ।
