वीरगंजय् कर्फ्यु
येँ(सन्ध्या टाइम्स)/माओवादी आमहडतालया प्रतिकार याः वःपिं अतिवादी हिन्दू कार्यकर्तातलिसे भिडन्त जुयाः थौं वीरगंजय् कर्फ्यु तयेमाःगु अवस्था वःगु दु। पर्सा जिप्रकां थौं न्हिनय् १ बजेनिसें वीरगंज उपमहानगरपालिकाया १९ गुलिं वडाय् कर्फ्यु तया बिउगु खः। थ्व कर्फ्यु मेगु सुचं जारी मजूतले कायम जुइगु खँ धाःगु दु ।
हिन्दू युवा संघया नामय् पिहांवःपिं मनूतय्सं आमहडताल विरुद्ध नाराबाजी यासें माओवादी कार्यकर्तातय्त आक्रमण नं यायेवं आमहडताल आह्वानकर्ता व प्रतिकार पुचः दथुइ ल्वापु जूगु खः। उगु आक्रमणय् लानाः माओवादीया च्याम्ह कार्यकर्ता घाःपाः जूगु दु ।
थौं सुथय् नगर सभागृह लागाय् माओवादी कार्यकर्तातय्तय्गु निंतिं हयातःगु खाद्यान्न व बन्दोवस्तीया सामान तकं उमिसं वांछ्वया बिउगु खः। इमिसं माओवादीं छ्यलाच्वंगु छगः गाडीइ मि नं तया बिउगु दु ।
