अमेरिकाय् नेवाः ज्याझ्वः
येँ (सन्ध्या टाइम्स)/अमेरिकाया वाशिंगटन डीसी नगरय् मेसिज डिपार्टमेन्ट स्टोरया ग्वसालय् नकतिनि जूगु 'पासपोर्ट डीसी' समारोहय् नेपाःया प्रतिनिधित्व यासें अमेरिकाया निंतिं नेपाःया राजदूतावास व नेवाः अर्गनाइजेशन अफ अमेरिकापाखें मंकाः रुपं ज्याझ्वः न्ह्यब्वल ।
ज्याझ्वलय् नेपाःया सांस्कृतिक ब्वज्या व हस्तकला प्रदर्शनी जूगु खः। उकी कलाकार यज्ञमान शाक्यं मंजुश्री व वज्रयोगिनी चचा प्याखं क्यंगु खःसा च्यादँ दुम्ह आयुषा खनालं लोकप्याखं न्ह्यब्वःगु खः। उकी नेवाः अर्गनाइजेशन अफ अमेरिकाया नायः राजेश श्रेष्ठ व आशा रेग्मीं न्ववानादीगु खः। ज्याझ्वलय् अमेरिकाया निंतिं नेपाःया राजदूत डा. शंकरप्रसाद शर्मा लगायत आपालं नेपाःमित सहभागी जुयादीगु खः ।
उगु समारोहय् नेपाः नापं मोरोक्को, हंगेरी, रुवाण्डा, हाइटी, बहामास, कोरिया, थाइल्याण्ड, इथियोपिया, स्वीडेन व बंगलादेशं नं ब्वति काःगु खः ।
