येँय् नेवाःतय्गु नं जुलुस
येँ(सन्ध्या टाइम्स)/देशय् न्ह्यानाच्वंगु आन्दोलनया झ्वलय् नेवाः स्वायत्त राज्य मंकाः संघर्ष समितिं कंस शनिवाः येँय् छगू र्याली पिकाइगु जूगु दु। शनिवाः न्हिनय् २ बजे येँया बसन्तपुलिं उगु र्याली पिकाइगु ग्वसाः दु। र्यालीं राष्ट्रिय सहमति कायम या, नेवाः स्वायत्त राज्यया ग्यारेन्टी या, धर्म निरपेक्षता लागू या, शान्ति सुरक्षा कायम या धइगु नारा बी। थौं च्वंगु संघर्ष समितिया बैठकं थ्व निर्णय याःगु खः ।
थ्वहे झ्वलय् थौं माओवादीया आम हडतालयात समर्थन यासें नेवाः राष्ट्रिय मुक्ति मोर्चां येँय् र्याली पिकायेत्यंगु दु। नेवाः मोर्चाया चिं दुगु हे लं फिनाः कार्यकर्तातय्सं नाराबाजी यासें थ्व र्याली पिकायेगु तयारी यानाच्वंगु दु। इमिसं संविधान इलय् हे मवल धाःसा नेवाः स्वायत्त राज्य नं मवइगु जुयाः सकलें नेवाःतय्त सतकय् कुहां वयेत आह्वान याइगु खँ दु। थौं न्हिनय् सांस्कृतिक बाजं नापं थानाः थ्व र्याली पिहां वइ। वंघलं पिहां वइगु र्याली असं, भोताहिति, भिंद्यःत्वाः, क्वहिति, थँहिति नापं येँया थीथी लागा चाःहिली ।
मेखे कन्हय् उद्योग वाणिज्य महासंघ, नेपाल चेम्बर अफ कमर्स, पापडपाखें कन्हय् सुथय् ९ बजे येँया बसन्तपुलिं छगू शान्ति र्याली पिकाइगु जूगु दु ।
