आखिर गन थानाच्वन ले वार्ता?
येँ (सन्ध्या टाइम्स)/जारी आम हडताल दिकाः शान्तिपूर्ण निकास मालेगु लागिं तःधंगु दलतय् दथुइ वार्ता नं न्हिंन्हिं हे जुयाच्वंगु दु। तर वार्ता जूसां निकास धाःसा मलू। आखिर खँ गन थानाच्वन ले?
पिनें स्वयेबलय् दलतय् वार्ता प्रधानमन्त्री हिलेगु खँय् जक थानाच्वं थें खने दुसां दुने दुने धाःसा वार्ताया प्याकेजय् उल्लेख जुयाच्वंगु राज्य पुनर्संरचना सम्बन्धी महत्वपूर्ण बुँदाय् नं खँ थानाच्वंगु खँ सूत्रं धाःगु दु। प्रधानमन्त्रीया राजीनामा नापं स्वाकाः हःगु उगु प्याकेजय् राज्य पुनर्संरचना समितिं पारित यानातःगु १४ प्रदेशया नक्सायात लित कायेमाः धइगु खँ नं दुथ्यानाच्वंगु दु। माओवादीं सहमति हे मयानाच्वंगु छगू बुँदा थ्व नं खः। १४ प्रदेशया प्रस्ताव लित कायेमाः धकाः दकलय् अप्वः कांग्रेसं बः बियाच्वंगु दुसा उकी एमालेया वार्ताकारतय्सं नं सहमति क्यनाच्वंगु दु। तर माओवादीं धाःसा थ्व प्रस्ताव आन्दोलनया बलं वःगु जूगुलिं उकियात थःपिंसं त्वःते फइ मखु अडान कयाच्वंगु दु। उगु प्याकेजय् खुगू बुँदात दुथ्यानाच्वंगु दु ।
दलतय् दथुइ जूगु वार्ताय् थ्व समेत खँय् सहमति मजुयाच्वंगु खःसां पिने धाःसा प्रधानमन्त्री सु जुइगु धइगु खँय् सहमति मजूगु खँ जक अप्वः चर्चाय् वयाच्वंगु दावी सूत्रं याःगु दु ।
