हड्तालया प्रतिकार यायेगु नीति मदु : खनाल
नेकपा (एमाले)या अध्यक्ष झलनाथ खनालं एनेकपा (माओवादी)या आम हड्तालयात प्रतिकार यायेगु एमालेया नीति मदुगु खँ धयादीगु दु ।
पार्टी मुख्यालय बल्खुइ बिहीवाः छगू पत्रकार सम्मेलन यानादिसें वय्कलं एमालेया प्रतिकार यायेगु छुं कथंया नीति मदुगु धयादिसें अज्याःगु घटना जूगु खःसा एमालें बिचाः याइगु धयादिल । वय्कलं एमालें हड्तालयात प्रतिकार मयाइगु धयादिसें पार्टी कार्यकर्तातय्त नं प्रतिकार मयायेत इनाप यानादिल । पत्रकार सम्मेलनय् खनालं हड्तालया प्रतिकारय् कुहांवयाः गोली क्येकूम्ह अपराधी जूगु धयादिल । वय्कलं अज्याःगु गोलीं क्येकूम्ह एमाले साधारण दुजः जुसां वयाता कारवाही जुइमाःगु धयादिल ।
माओवादीया आम हडतालया झ्वलय् एमालेया युवा संगठन युथ फोर्सया कार्यकर्तातय्सं थीथी थासय् प्रतिकार याःगु व बुधवाः ख्वपय् गोली तकं चले याःगु द्वपं माओवादीं बियाच्वंगु इलय् एमाले अध्यक्ष खनालया थंज्याःगु धापू पिहांवःगु खः ।
वय्कलं माओवादीया धम्की व आक्रमण यायेगु ज्या अलोकतान्त्रि व अधिनायकवादी जूगु टिप्पणी यानादिसें माओवादीयात थ्व आम हड्ताल लितकयाः सहमति मार्फत समस्या ज्यंकेत इनाप यानादिल । वय्कलं दलत दथुइ जुयाच्वंगु वार्ताय् महत्वपूर्ण विषयलय् प्रगति जूगु धयादिसें याकनं समस्याया निकास पिहांवइगु विश्वास प्वंकादिल ।
