आम हड्तालया न्यान्हुया न्हि / थीथी थासय् माओवादीया प्रतिकार
शान्ति व संविधानया निंतिं थःगु नेतृत्वय् राष्ट्रिय सहमतिया सरकार गठन जुइमाःगु माग यासें एकीकृत नेकपा (माओवादीं) यानाच्वंगु आम हड्ताल थौं न्यान्हुइ क्यंगु दु । आम हड्तालं देय्न्यंयका जनजीवन थप कष्टकर जुयावंगु दुसाः माओवादी प्रदर्शनया थीथी थासय् प्रतिकार नं जूगु दु ।
येँया थीथी थासय् माओवादी प्रदर्शनयात प्रतिकार यायेवं माओवादीया शीर्ष नेतातय् नेतृत्वय् येँय् माओवादीं छगू तःजिगु ह्याउँगु जुलुस पिथंगु दु । उगु जुलुसय् माओवादी उपाध्यक्षत डा. बाबुराम भट्टराई व नारायणकाजी श्रेष्ठ 'प्रकाशं', महासचिव रामबहादुर थापा 'बादल', सचिव सिपी गजुरेल लगायतया ब्वति दुगु खः ।
थ्वस्वयां न्ह्य: सत्तारुढ दलतय् युवा नेतातय् नेतृत्वय् येँया थीथी थासय् जूगु प्रतिकारय् निगू पक्ष दथुइ ल्वापु तकं जूगु दु । येँया बुढानिलकण्ठ, जारेपाटी, बसुन्धारा लगायत थासय् माओवादी कार्यकर्तातय्सं जवरजस्ती याःगु धासें प्रतिकार याःगु खः ।
बुढानिलकण्ठय् माओवादी कार्यकर्ता व स्थानीयवासीत दथुइ ल्वापु जूगु दु । माओवादीं पिकाःगु जुलुसय् अन अप्पां क्येकूगु धासें ल्वापू जूगु खः । अज्ञात पुचःया अप्पां लाना गुदँया मचा रोशन मगर घाःपाः जूगु दु । स्थिति तनावपूर्ण जुइवं प्रहरीं न्यागू राउण्ड अश्रुग्यास प्रहार याःगु खः । माओवादीं अन युथ फोर्सया कार्यकर्तातय्सं थःपिंत आक्रमण याःगु वः थःपिनिगु स्वीम्ह कार्यकर्तातयत ज्वना यंकूगु द्वपं ब्यूगु दु ।
जोरपार्टीलय् चायेकूगु छगू पसलय् माओवादी कार्यकर्तातय्सं तोडफोड यायेवं अन स्थानीयवासी व माओवादी कार्यकर्तात दथुइ ल्वापु जूगु दु । ल्वापुइ लानाः झिम्ह स्थानीयवासी घाःपाः जूगु दु । उखे बसुन्धाराय् क्षेत्रय् जूगु ल्वापुइ निम्ह स्थानीयवासी व निम्ह माओवादी कार्यकर्ता घाःपाः जूगु दु ।
अथेहे वीरगञ्जय् माओवादी कार्यकर्ता व हिन्दू युवा संघ दथुइ ल्वापू जूगु दु । आम हड्तालय् पसः बन्द यायेत इनाप यासें पिहांवःगु जुलुस व पसः चायेकेत इनाप यायेत इनाप यासें पिहांवःगु हिन्दू युवा संघया कार्यकर्तात दथुइ ल्वापु जूगु खः । ल्वापुइ लानाः स्वम्ह माओवादी कार्यकर्ता घाःपाः जूगु दुसाः अन स्थित तनावपूर्ण जुइवं प्रशासनं कर्फ्यू तयेगु निर्णय याःगु खः । तर लिप्पांगु इलय् सुरक्षाकर्मीत जक थप यायेगु यासें कर्फ्यू मयायेगु निर्णय याःगु दु ।
