भारतीय राजदूत व प्रचण्ड दथुइ खँल्हाबंला / अमेरिकी राजदूतं भट्टराई नापलात
आम हड्ताल यानाच्वंगु एनेकपा (माओवादी)या शीर्ष नेतातय्त भारतीय व अमेरिकी राजदूततय्सं नापलाना खँल्हाबंला याःगु दु । भारतीय रादूत राकेश सुदं माओवादी अध्यक्ष पुष्पकमल दाहाल 'प्रचण्ड' नाप खँल्हाबंला याःगु दुसाः अमेकिरी राजदूत स्कट एच. डेलिसीं माओवादी उपाध्यक्ष डा. बाबुराम भट्टराई नाप खँल्हाबंला यानादीगु दु ।
बिहीवाः सुथय् प्रचण्ड निवास न्हू बजारय् थ्यंकाः भारतीय राजदूत सुदं माओवादीं यानाच्वंगु आन्दोलनया बारे च्यूताः प्वंकादीगु खः । वय्कलं माओवादीयात आन्दोलन लितकाया सहमति मार्फत समस्या ज्यंकेत इनाप यानादीगु खः ।
अथेहे बिहीवाः हे अमेरिकी राजदूत डेलिसी भट्टराई निवास शान्तिनगर थ्यंकाः आमहड्ताल नापं दलत दथुइ सहमतिया निंतिं जुयाच्वंगु कुतःया बारे च्यूताः प्वंकादीगु खः । वय्कलं सहमति यानाः राजनीतिक गतिरोध ज्यंकेमाःगु खँय् बः बियादिल ।
राजदूत डिलेसीं नेपाःया शान्ति प्रकृयाय् अन्तर्राष्ट्रिय क्षेत्रं म्हितेमाःगु भूमिका व उकीया निंतिं ग्वाहालि यायेत अमेरिका तयार जूगु धयादिल । उगु इलय् भट्टराईं माओवादी शान्ति व प्रजातान्त्रिक तरिकां हे न्ह्याः वनेगु धयादिल ।
थौं हे स्विट्जरल्याण्डया राजदूतं माओवादी अध्यक्ष प्रचण्डयात नापलाना खँल्हाबंला याःगु दु । स्विट्जरल्याण्ड राजदूत थोमस ग्यासं आवश्यक जुसाः राजनीतिक गतिरोधया निंतिं मध्यस्थता यायेत नं तयार जूगु खँ धयादीगु खः ।
