प्याकेजय् सहमति यायेत नेतात तयार
आन्दोलनरत एनेकपा (माओवादीं) दक्वं विषयया समाधान प्याकेजय् यायेमाःगु खँ धयाच्वंगु इलय् थुकी नेपाली कांग्रेस नं तयार जूगु दु । प्याकेजय् सहमति यायेत नेकपा (एमाले) न्हापा हे तयार जुइधुंकूगु खःसा आः थुकी कांग्रेस नं तयार खनेदुगु दु ।
बुधवाः च्वंगु स्वंगू दलया शीर्ष नेतातय् बैठक लिपा कांग्रेस नेता अर्जुननरिसंह केसीं सहमति व सहकार्यकया विकल्प मदुगु धयादिसें समस्याया समाधान प्याकेजय् हे मालेमाःगु खँय् बः बियादिल । वय्कलं माओवादीं आन्दोलन लितकयाः वार्तातय् वयेगु विकल्प मदुगु धयादिल ।
थ्वहे दथुइ येँया होटल र्याडिसनय् जूगु स्वंगू दलया बैठकं दुईपक्षीय व त्रिपक्षीय सहलहयात निरन्तरता बीगु निर्णय याःगु दु । बुधवाः बहनी च्वंगु बैठकय् दलत दथुइ थप सहलह यायेमाःगु अवश्यकता दुगु धासें निगू दल व स्वंगू दल च्वनाः थप सहलह यायेगु निर्णय याःगु खः ।
बैठक लिपा माओवादी उपाध्यक्ष नारायाणकाजी श्रेष्ठ 'प्रकाशं' थौंया बैठकय् नं निष्कर्षय् थ्यनेमफुगु धयादिसें वार्ता व आन्दोलनयात नापं यकेगु कनादिल । अथेहे एमाले नेता प्रदीप ज्ञवालीं दलत दथुइ अझ सहलह यायेत जरुरी जूगु धयादिल । वय्कलं देय्यात दुर्घटनाय् वने मबीगु धयादिसें जनतां भागे यायेमाःगु समस्यात याकनं अन्त्य यायेमाःगु खँय् दक्वं सहमत जूगु कनादिल ।
बैठकय् माओवादी अध्यक्ष पुष्पकमल दाहाल 'प्रचण्ड', वरिष्ठ उपाध्यक्ष मोहन बैद्य, उपाध्यक्षत डा. बाबुराम भट्टराई व नारायणकाजी श्रेष्ठ 'प्रकाश', नेता देव गुरुङ, कांग्रेस पाखें कार्यवाहक सभापति सुशील कोइराला, बरिष्ठ नेता शेरबहादुर देउवा, उपसभापति रामचन्द्र पौडेल, महामन्त्री विमलेन्द्र निधि, नेतात कृष्ण सिटौला, डा. रामशरण महत, अर्जुननरसिंह केसी व एमालेया पाखें अध्यक्ष झलनाथ खनाल, महासचिव इश्वर पोखरेल, सचिव विष्णु पौडेल, नेतात भरतमोहन अधिकारी व प्रदीप ज्ञवालीया ब्वति दुगु ख: ।
