आन्दोलन बारे नेवाः न्ह्यलुवातय् चिउताः
येँ (सन्ध्या टाइम्स)/एनेकपा (माओवादी) पाखें न्ह्याकाच्वंगु वर्तमान आन्दोलनयात कयाः नेवाः न्ह्यलुवातय्सं थःपिनि चिउताः प्वंकूगु दु। थौं जूगु छगू नेवाः मुँज्याय् सहलह लिपा मंकाः वक्तव्य पिकासें वर्तमान अन्यौलयात गुलि फु याकनं निकास बीत मू मू राजनीतिक दलतय् दथुइ लोकतान्त्रिक विधि कथं सहमति ब्वलंकाः अग्रगामी शक्तितय् मंकाः सरकार नीस्वनेगु व जुयाच्वंगु अनिश्चितकालिन हडतालपाखें जनताया न्हिथंया जीवनय् लाकाच्वंगु प्रभावयात लुमंकाः प्रमुख प्रतिपक्षी एनेकपा (माओवादी)या आन्दोलनया फुक्क ज्याझ्वः दिकेत माग याःगु दु ।
वक्तव्यय् सेना समायोजन व शान्ति प्रक्रियायात याकनं माःगु थासय् थ्यंकेगु व नेवाः स्वायत्त प्रदेश, धर्मनिरपेक्ष राज्य, संघीयता, लोकतान्त्रिक गणतन्त्र सुनिश्चित यायेगु निंतिं संविधानसभा क्रियाशिल यानाः न्हूगु संविधान इलय् च्वये सिधयेकेत नं इनाप यानातःगु दु ।
वक्तव्यय् लक्ष्मीदास मानन्धर, वीरेन्द्रभक्त श्रेष्ठ, नरेश ताम्राकार, मल्ल के. सुन्दर, डा. महेशमान श्रेष्ठ, विजय सैंजु, सानुराजा शाक्य, सुजिव वज्राचार्य, डा. चुन्दा वज्राचार्य, मोहन कृष्ण डंगोल, नरेशवीर शाक्य नापं ५६ म्ह नेवाः न्ह्यलुवातय्सं हस्ताक्षर यानातःगु दु ।
थ्वहे खँयात न्ह्यःने तसें नेवाः न्ह्यलुवातय्सं याकनं हे छगू जुलुस नं पिकायेगु तयारी जुयाच्वंगु खँ धाःगु दु ।
