मन्त्रीत चान्हय् हे सिंहदरवार प्रवेश
येँ (सन्ध्या टाइम्स)/एकीकृत माओवादीं आमहडताल तच्वयेका यंकेगु झ्वलय् थनिंनिसें मन्त्रीतय्त सिंहदरवारय् प्रवेश मयाकेगु ज्याझ्वः घोषणा यायेवं मन्त्रीत सुथय् ३ बजे हे सिंहदरवार दुहां वनाच्वनेधुंकूगु खँ सीदुगु दु ।
माओवादी कार्यकर्तात सुथय् ५ बजेनिसें हे आमहडतालया निंतिं सतकय् कुहां वइगु खँ सीकाः थौं सुथय् ३ बजे हे मन्त्रीत सिंहदरवारय् दुहां वनाच्वनेधुंकूगु खः ।
चान्हय् हे उपप्रधानमन्त्री विजय गच्छेदार, गृहमन्त्री भीम रावल, सूचना तथा संचार मन्त्री शंकर पोखरेल लगायत मेमेपिं मन्त्रीत सिंहदरवारय् दुहां वंगु खः ।
म्हिगः तिनि माओवादीया केन्द्रीय पदाधिकारी बैठकं थनिंनिसें मन्त्रीतय्त सिंहदरवारय् प्रवेश मयाकेगु ज्याझ्वः न्ह्याकेगु धकाः निर्णय याःगु खः ।
सिंहदरवारया गोप्य खँ नं पिहां वल धकाः थौं सुथय् सरकारं संकारकर्मीतय्त तकं सिंहदरवारय् प्रवेश निषेध याःगु खः। मन्त्रीत प्रहरीया गाडीइ च्वनाः सिंहदरवारवनाच्वंगु समाचार पिहां वल धकाः संचारकर्मीतय्त तकं सिंहदरवारय् प्रवेश निषेध याःगु खः। थौं माओवादी कार्यकर्तातय्सं सिंहदरवारयात प्यखेरं घेरे यानाः अन सुयातं दुत पित याकाच्वंगु मदु ।
