अग्रगामीतय् सहमतिया सरकार दयेकेत इनाप

येँ (सन्ध्या टाइम्स)/देशय् न्हूगु संविधान जारी यानाः जनताया आकांक्षा पूवंकेमाःगु वर्तमान अवस्थाय् राजनीतिक पार्टीतय् दथुइ ब्वलनाच्वंगु कचवंयात कयाः नेवाः राष्ट्रिय आन्दोलन व नेवाः देय् गुथि, नेपालमण्डलपाखें मंकाः चिउताः प्वंकूगु दु ।

निगुलिं पुचलं जारी याःगु मंकाः इनापय् धयातःगु दु - थौं झीगु देशय् अग्रगामी सोच कयाच्वंपिं राजनीतिक शक्तितय्सं व थःथःगु जातीय मुक्तिया निंतिं ल्वानाच्वंपिं आदिवासी, जनजाति, दलित, मधेशी व थीथी धार्मिक समुदायया जनतां ल्वःमंके मजिउगु खँ छु धाःसां झीगु देय् थौं पुलांगु सामन्ती प्रतिक्रियावादी राज्य संयन्त्र व व्यवस्थायात क्वःथलाः न्हूगु नेपाः, फुक्क भाषाभाषी, फुक्क धर्मावलम्बी व फुक्क आदिवासी जनजाति नापं सकल जनताया समान अधिकार दुगु व उत्पीडन मुक्तगु समाज पलिस्था यायेत संघर्ष यानाच्वनागु संक्रमणया स्थितिइ एकता, सहमति व ग्वाहालिं न्ह्यज्यायेमाःगु खः। थौं पुलांगुयात थुनाः न्हूगु समाज नीस्वनेमाःगु इलय् झीथाय् अग्रगामीतय् दथुइ सहमति व सहयोगं जक न्ह्यज्याये फइ। थ्व वातावरण दयेकेगु कर्तव्य फुक्क अग्रगामी राजनीतिक पार्टीया नेतापिनिगु खः, विशेष यानाः सरकारय् च्वंगु तःधंगु पार्टीतय्गु खः। झीगु थौंया व्यवस्था बेलायतया वेष्ट मिनिष्टर मार्का संसदया थें मखु, नेपाःया थःगु हे पहःया समावेशी व सहभागीमूलक संविधानसभा खः। थ्व खँयात ल्वःमंकाः व्यवस्थापिकाय् थःगु बहुमत दु वा संसदया बहुमतं जक सरकार हिले फइ धकाः बहुमत व अल्पमतया खँ पिकायेगुया अर्थ सहमतिया वातावरण न्हंकाः अग्रगामीतय् दथुइ ल्वापु ब्वलंकाः प्रतिगामीतय्त तिबः बीगु जुइ ।

प्रधानमन्त्रीं बिउगु राष्ट्रयात सन्देश व माओवादी पार्टीं याःगु अनिश्चितकाल तकया आम हडतालं पित हःगु ल्वापुया स्थितिं न्हूगु नेपाः दयेकेगु अभियान, संविधान दयेकेगु ज्या, नेपाली जनताया तःजिगु संघर्षं हःगु गणतन्त्र, संघीय राज्य व धर्म निरपेक्षताया उपलब्धी रक्षा यायेगु व जातीय स्वायत्तता व स्वशासन नापं समान अधिकार प्राप्त यायेगु आकांक्षाय् पंगः हइ। थ्व स्थितिइ दक्व नेवाः जनता सक्रिय जुयाः अग्रगामी शक्तितय् दथुइ सहमतिया स्थिति ब्वलंकाः याकनं निर्णायक स्थितिइ थ्यंकेत कुतः यायेमाःगु दु। थुकिया निंतिं याकनं अग्रगामीतय् सहमतिया सरकार दयेकाः न्हूगु नेपाःया संघीय गणतान्त्रिक संविधान जारी यायेगु स्थितिया लँ चायेकेत सकसितं जोडदार इनाप यानाच्वना ।