तरकारीया भाः निदुगं थहां वन
येँ (सन्ध्या टाइम्स)/माओवादीं न्ह्याकाच्वंगु आमहडतालं यानाः पिनें वयेमाःगु सामान मवयाः स्वनिगलय् बजाःभाः थहां वनेगु शुरु जूगु दु। म्हिगःनिसें स्वनिगःया तरकारी बजारय् ५० निसें शतप्रतिशत तक बजाःभाः थहां वनाच्वंगु दु। स्वनिगलय् तरकारी न्यायेगु मदुसा उखे पिने जिल्लाय् धाःसा बजारय् तक तरकारी यंकेगु अवस्था मदुगुलिं अथें वांछ्वये माःगु अवस्था वःगु दु। गाडी चले मजूगुलिं अथें मुंकातःगु तरकारी नं ध्वगिना वःगु खँ स्थानीय किसानतय्सं धाःगु दु ।
येँया कालिमाटी तरकारी बजारय् छुं न्हि न्ह्यवंनिसें तयातःगु स्टक नं आः फुना वनाच्वंगु दुसा दुगु स्टक अप्वः दां कयाः मीगु याना हःगु खँ धाःगु दु। पिने जिल्लां येँय् तरकारी ज्वना वइगु गाडीयात त्वःतेगु लाकि मत्वःतेगु धइगु खँयात कयाः वार्ता जुयाच्वंगु खँ सीदुगु दु ।
