आम हड्तालयात प्यन्हुया न्हि / मन्त्रीत स्वताः इलय् हे सिंहदरवारय्
एकीकृत नेकपा (माओवादीं) यानाच्वंगु आम हड्तालया प्यन्हुया न्हि नं देय्न्यंया जनजीवन प्रभावित जूगु दु । थनिनिसें माओवादीं हड्तालयात सशक्त यायेगु धासें मन्त्रीतय् सिंहदरवरय् दुहांमछ्वयेगु निर्णय याःसां सरकारया मन्त्रीत धाःसा सुथसिया स्वताः इलय् हे सिंहदरवार थ्यंकूगु खः ।
आम हड्तालया प्यन्हुया न्हि माओवादीं याःगु बन्दया विरोधय् ख्वपय् एमाले युवा संगठन युथ फोर्सया अध्यक्ष महेश बस्नेतया नेतृत्वय् जुलुस पिथनेवं अनया स्थिति तनावग्रस्त जूगु खः । अन निगू राउण्ड गोली नापं चले जुसां सुनां गोली चले याःगु खँ सीकेमफुनी । माओवादीं ख्वपः नगरपालिका वडा नं ९लय् युथ फार्सया कार्यकर्तातय्सं गोली चले याःगु दावी याःगु दु । माओवादीं अन प्यंगू राउण्ड गोली व म्यागजीन लुइकूगु दु । उखे युथ फोर्सं धाःसा माओवादीं गोली क्येकूगु द्वपं बिउगु दु ।
अथेहे हुम्लाय् माओवादीनाप एमाले व कांग्रेस कार्यकर्ताया ल्वापु जूगु दु । सदरमुकाम सिमिकोटय् जूगु ल्वापुइ माओवादी कार्यकर्ता विजय भण्डारी घाःपाः जूगु दु । स्वन्हु न्ह्यः माओवादीं अपहरण याम्ह एमाले जिल्ला कमिटी दुजः बर्खबहादुर रोकाययात त्वते माःगु व शान्ति सुरक्षाया माग यासें एमाले व कांग्रसें जिल्ला प्रशासन ज्याकूथी ज्ञापनपत्र लःल्हा वंगु इलय् ल्वापु जूगु खः ।
उखे बुटवलय् माओवादी कार्यकर्तातय्सं छुं ईया निंतिं बुटवल नगरपालिकाया ज्याकू थःगु कब्जाय् काःगु दु । उगु इलय् माओवादी कार्यकर्तातय्सं अनं पार्टीया ध्वाँय् नं तःगु खः । लिपा अन सुरक्षाकर्मीतय्सं माओवादी कार्यकर्तातयात अश्रु ग्यास क्येकाः तितरवितर यानाः ज्याकूयात माओवादी कब्जां मुक्त याःगु खः । अनं माओवादीया ध्वाँय् नं लितकाःगु दु ।
उगु इलय् माओवादी व सुरक्षाकर्मीतय् दथुइ ल्वापु जूगु खःसा उकी लाना झिम्ह माओवादी कार्यकर्तात घाःपाः जूगु दु । आक्रोशित माओवादी कार्यकर्तातय्सं ट्राफिक चोक स्थित प्रहरी बिट च्याकाः ब्यूगु दु ।
धनकुटय् माओवादीया युवा संगठन वाइसीएलया जुलुसय् युथफोर्सं आक्रमण याःगु दु । आक्रमण लिपा हुलाक टोलय् जूगु ल्वापुइ निम्ह घाःपाः जूगु दु । युथ फोर्सं बन्दया विरोधय् पिकागु जुलुस वाइसीएलं प्रदर्शन यानाच्वंगु थासय् थ्यनेवं उगु आक्रमण जूगु खः ।
