सतुंगलवासीत अग्रगमनया पक्षय् : प्रकाश

एकीकृत नेकपा (माओवादी)या उपाध्यक्ष नारायणकाजी श्रेष्ठ 'प्रकाशं' सतुंगलवासीत अग्रगमनया पक्षय् दुगुलिं आन्दोलनयात समर्थन यानाच्वंगु खँ धयादीगु दु ।

बुधवाः सतुंगलय् माओवादी ग्वसाःग्वःगु कोणसभायात सम्बोधन यानादिसें उपाध्यक्ष प्रकाशं सतुंगल घटना प्रतिक्रियावादीतय् षड्यन्त्र जूगु धयादिसें माओवादी आन्दोलनयात स्थानीयवासीतय्सं प्रतिकार यात धकाः वःगु बुखँ पाखें सतुंगलवासीतय्त अपमान याःगु धयादिल । वय्कलं सतुंगलवासीं माओवादी आन्दोलनयात प्रतिकार याःगु धइगु बुखँ भ्रमपूर्ण जूगु दावी यानादिल ।

आपालं सतुंगलवासीतय् उपस्थिति जूगु सभाय् माओवादी नेतृ हिसिला यमि, पोलिटब्यूरो दुजः जनार्दन शर्मा 'प्रभाकर' लगायत नेतातय् उपस्थिति दुगु खः । मंगलवाः सतुंगलया स्थानीयवासी व माओवादी दथुइ मोटरसाइकल तोडफोडया विषयलय् ल्वापु जूगु खः ।