जनताया माग पूमवंसाः मातृका यादवं हानं आन्दोलन यायेगु ख्याच्वः
मातृका यादवं नेतृत्व याःगु नेकपा (माओवादीं) आः न्ह्यानाच्वंगु एनेकपा (माओवादी)या आन्दोलनं जनताया माग पूमवंसाः थःपिंसं हानं आन्दोलन यायेगु ख्याच्वः ब्यूगु दु ।
बुधवाः माओवादीं बुटवलय् याःगु पत्रकार सम्मेलनय् आः तकया दक्वं आन्दोलन सम्झौताय् क्वचाःगुलिं आन्दोलनया उपलब्धीत हासिल यायेमफुगु धयादिल । वय्कलं आः जुयाच्वंगु एनेकपा (माओवादी)या आन्दोलन नं सहमतीलय् क्वचासाः क्रान्तिकारी योद्धातय्त कयाः थःपिंसं हानं आन्दोलन यायेगु ख्याच्वः बियादिल ।
वयकलं वर्तमान आम हड्तालयात आलोचनात्म समर्थन नं यानादीगु दु । क्रान्तिकारी जनता परिवर्तनया निंतिं आन्दोलनय् कुहांवःगुलिं थुगु हड्तालयात समर्थन यानाःगु धयादिल । वय्कलं जनता सरकार परिवर्तन मखसें जनसंविधान व राज्य व्यवस्था परिवर्तनया निंतिं सतकय् कुहांवःगु धयादिसें माओवादी आन्दोलन नं राज्य सत्ता कब्जाया निंतिं जनविद्रोहलय् परिणत जुइमाःगु धयादिल ।
