येँय् उपभोग्य वस्तुया अभाव मदु : गच्छदार
उपप्रधानमन्त्री विजयकुमार गच्छदारं येँय् खाद्यन्न व पेट्रोलियम पदार्थया अभाव मदुगु दावी यानादीगु दु ।
बुधवाः सिंहदरवारय् उपलब्ध मन्त्रीतय् अनौपचारिक बैठक लिपा पत्रकारतनाप खँल्हाबंला यानादिसें वय्कलं अत्यावश्यक वस्तुया अभाव मजूगु व अज्याःगु वस्तुया अभाव जुइ मबीत सरकार सचेत जूगु धयादिल । वय्कलं थंज्याःगु उपभोग्य वस्तुया वितरण व्यवस्थाय् समस्या जूगु धयादिसें उकीया समाधान निन्हु स्वन्हु लिपा जुइगु दावी यानादिल ।
वय्कलं माओवादी आम हड्तालयात जनतां थःगु विमति प्वंकेगु ज्या शुरु जूगु धयादिसें तराईलय् थुकीया प्रभाव न्यून जूगु दावी यानादिल । वय्कलं तराईलय् बन्द च्यायेगु शुरु जूगु व छुं न्हि लिपा येँय् नं अज्याःगु हे जुइगु धयादिल ।
राज्य संयमित जूगुलिं माओवादीया आम हड्तालया स्थिति उत्तेजक मजूगु धयादिसें मन्त्री गच्छदारं हड्ताल ताः ई तक न्ह्यासाः उकीं माओवादीयात हे क्षति याइगु दावी यानादिल ।
