कांग्रेस व एमाले दथुइ माओवादी लडाकुया बारे सहलह
राजनीतिक गतिरोधया निकास मालेत च्वंगु सत्तारुढ दलत नेकपा (एमाले) व नेपाली कांग्रेस दथुइया बैठकय् माओवादी लडाकुया समायोजन व पुनःस्थपनाया बारे सहलह जूगु दु ।
मंगलवाः प्रधानमन्त्री निवास बालुवाटारय् जूगु खँल्हाबंलाय् गुलीया ल्याख्यय् माओवादी लडाकुया समायोजन यायेगु व गुवलय् तकया दुने यायेगु बारे सहलह जूगु दु । सहलह लिपा कांग्रेस संसदीय दलया नेता रामचन्द्र पौडेलं निगू दल दथुइ विशेष यानाः माओवादी लडाकुया समायोजन व पुनःस्थपनाया बारे खँल्हाबंला जूगु कनादिल ।
अथेहे बैठकय् राजनीतिक गतिरोध ज्यंकेत प्याकेजय् हे सहलह यायेगु बारे नं सहलह जूगु दु । बैठकय् कांग्रेस कार्यवाहक सभापति सुशील कोइराला, संसदीय दलया नेता रामचन्द्र पौडेल, महामन्त्री विमलेन्द्र निधि व एमालेया पाखें महासचिव इश्वर पोखरेल, नेता भरतमोहन अधिकारी लगायत नेतातय् उपस्थिति दुगु खः ।
