प्रमयात राजीनामा यायेत नागरिक समाजया इनाप

प्रधानमन्त्रीयात थःगु पदं राजीनामा बियाः राजनीतिक समस्या ज्यंकेगु लँपु च्याकेत नागरिक समाजं इनाप याःगु दु । नापं आन्दोलनरत एनेकपा (माओवादी)यात थःगु आम हडताल लितकया सहमति यायेत नं इनाप याःगु दु ।

नागरिक समाजया पाखें नागरिक अगुवा देवेन्द्रराज पाण्डें मंगलवाः छगू विज्ञप्ति पिथनाः प्रधानमन्त्रीया राजीनामा व माओवादीं आम हडताल लित नापं कायेमाःगु माग यासें दक्वं समस्याया समाधान सहमति व सहकार्य पाखें यायेत निगूलिं पक्षयात इनाप याःगु दु ।

वर्तमान सरकार शान्ति व संविधान निर्माण यायेत असफल जुइधुंकूगुलिं राष्ट्रिय सहमतिया सरकार गठन यायेमाःगु खँ विज्ञप्ति न्ह्यथंनातःगु दु । अथेहे अज्याःगु सरकार न्हूगु संविधान निमार्ण यानाः संसदीय चुनाव मजुतल्ले कायम जुइमाःगु खँ नं धाःगु दु ।