बन्दं यानाः उद्योग बजाः अस्तव्यस्त

येँ (सन्ध्या टाइम्स)/आम हडतालया झ्वलय् नं माओवादीं सर्वसाधारणयात बहनी निघौ पसः चायेकेगु छुट बिउसां निन्हु प्यन्हु लिपा पसलय् मीगु सामान हे मदया वनीगु अवस्था वःगु दु। छगू ला पिनें गाडी मवःगु कारणं स्वनिगलय् खाद्यान्न वयेगु बन्द जुयाच्वंगु दु। उखे थौंकन्हय् पसः चायेकाच्वंपिं खुद्रा व्यापारी जक खः। होल सेलरतय्सं धाःसा पसः चायेकूगु मदुनि। थुकिं यानाः खुद्रा पसलय् सामान फूलिसे थन खाद्यान्नया हाहाकार शुरु जुइफुगु सम्भावना दु ।

उखे म्हिगःनिसें बजारय् वाउँचा न्याये मदयावंगु दु। उकुन्हुंनिसें हयातःगु तरकारी म्हिगः छन्हुयात जक गाःनि। पिनें तरकारी मवःगुलिं थनिंनिसें तरकारी नं अभाव जुइगु खँ व्यापारीतय्सं धाःगु दु। थ्वहे मौकाया लबः कयाः नयेगु नसा ज्वलनय् भाः थहां वनेगु नं शुरु जुइधुंकूगु दु ।

छन्हु नेपाल बन्द जुइबलय् १ अर्ब २५ करोड तका दां देय्यात घाटा जुइगु ल्याःचाः पिकयातःगु दु। थ्व छन्हुया दुने जक जुइगु घाटा खः। पर्यटन आदि थेंज्याःगु उद्योगय् लाइगु लिच्वः दूरगामी जुइगुलिं उकिं गुलि घाटा जुइगु खः उकिया ल्याःचाः धाःसा पिकाःगु मदुनि ।

नेपाःया थीथी भन्सार नाकां न्हिं ९ करोड तका तक राजश्व दुकायेगु ज्या यानाच्वंगु दु। तर थ्व बन्दं यानाः न्यागः ध्यबा हे दुहां वयाच्वंगु मदु। नेपाः वइपिं पर्यटकतय्सं थःपिनि बुकिङ्ग रद्द याना हःगु दुसा उखे वैदेशिक रोजगारीया लागिं विदेश वनेत्यंपिं नेपाःमित नं भिसा वयेधुंकूसां थःथःगु छेँय् अथें च्वनेत बाध्य जुयाच्वंगु दु। यदि तःन्हु तक नं उपिं वने मफुत धाःसा उमिगु भिसा रद्द जुइफु धाःगु दु ।