आमहडतालया समर्थनय् यलय् नेवाः जुलुस
येँ (सन्ध्या टाइम्स)/माओवादीं आह्वान यानातःगु अनिश्चितकालीन आमहडतालयात समर्थन यासें यलय् नेवाःतय्गु बिस्कं जुलुस पिहांवःगु दु। माओवादीया जातीय मोर्चा नेवाः राष्ट्रिय मुक्ति मोर्चा यल जिल्ला समितिया आह्वानय् मंगल बजारय् मुनाः द्वलंद्वः नेवाःतय्सं नेवाः भासं हे नारा थ्वयेकाः उगु जुलुस पिकाःगु खः। यलया सापारु चाःहिलीगु रुट चाःहिउगु उगु जुलुस कोपुण्डोलय् थ्यंकाः क्वचायेकूगु खः ।
जुलुसय् ब्वति काःपिं प्रदर्शनकारीतय्सं नेवाः स्वायत्त राज्य संविधानय् सुनिश्चित यायेमाःगु, क्वःछिनातःगु इलय् हे न्हूगु संविधान जारी यायेमाःगु नापं माओवादीं थ्वयेकाच्वंगु थीथी कथंया नारा थ्वयेकूगु खः ।
अथे हे नेवाःतय्त सतकय् क्वकायेगु निंतिं माओवादीं नेवाःतय्गु चुक-चुकय् नापं जुलुस वनेगु व नेवाः भासं हे कोणसभा यायेगु ज्या तकं अभियानया रुपय् न्ह्याकूगु दु। थ्वहे झ्वलय् म्हिगःनिसें हे येँय् धिमे बाजं थानाः तकं नेवाःतय्सं आमहडतालया समर्थनय् येँय् जुलुस पिकायेगु शुरु याःगु दु। थौं नं उकथं हे अभियान न्ह्याकेगु खँ नेवाः राष्ट्रिय मुक्ति मोर्चा येँ जिल्लाया नायः उमेश स्थापितं धयादीगु दु ।
