हडतालं यानाः मत मसित
येँ (सन्ध्या टाइम्स)/माओवादीं न्ह्याकूगु आमहडतालं यानाः देय्या उद्योग कलकारखाना छुं हे चले मजूगु कारणं सर्वसाधारणया छेँय् जुयाच्वंगु लोडशेडिङ छुं भचा म्हो जूगु दु। कलकारखानाय् मत छ्वये म्वाःगुलिं नेपाल विद्युत प्राधिकरणं छुं जानकारी हे मबिसे लोडशेडिङ म्हो याःगु खः। तर आः छुं भचा लोडशेडिङ म्हो जूसां आमहडताल क्वचायाः कल कारखाना चले जुइगु शुरु जुल कि पुलांगु हे लोडशेडिङ कायम जुइगु खँ विद्युत प्राधिकरणं धाःगु दु ।
थौंकन्हय् वा वयेगु नं शुरु जूगु व च्वापुगुँया च्वापु नायाः खुसिइ लः नं अप्वया वःगुलिं आः लागू जुयाच्वंगु न्हिं १२ घौया लोडशेडिङ आः छुं भचा क्वपालेगु खँ प्राधिकरणं धाःगु दु ।
उखे राससं धाः कथं कुलेखानीइ लः म्हो जूगुलिं अन छुं न्हि जक विद्युत पिकाये फइगु जूगु दु ।
