मन्त्रीतय् सिंहदरवार दुहांवनेमबीगु
नेवाःतय्त आन्दोलनय् क्वकायेगु विशेष तयारी
आन्दोलनरत एनेकपा (माओवादीं) थःपिगु शान्तिपूर्ण आन्दोलनयात सरकारं बेवास्त याःगु धासें कन्हय् निसें थुकीयात सशक्त यायेगु निर्णय याःगु दु ।
मंगलवाः पार्टी अध्यक्ष पुष्पकमल दाहाल 'प्रचण्ड' निवास न्हू बजारय् च्वंगु पदाधिकारीतय् बैठकं निरन्तर वार्ता याःसां सहमति यायेत मेमेगू दल गम्भीर मजूगु धासें आन्दोलनयात सशक्त यायेगु निर्णय याःगु खः । आन्दोलनयात सशक्त दयेकेत माओवादीं कन्हय् निसें मन्त्रीतय्त सिंहदरवारय् दुहांवनेमबीगु निर्णय याःगु दु ।
अथेहे आन्दोलनय् नेवाः समुदाययात क्वकायेगु ताः तया विषेश ज्याझ्वः ह्येगु निर्णय याःगु दु । नेवाःतय्त आन्दोलनय् ब्वति कायेत इनाप यायेगु निंतिं नेवाः नेतात नापं नेवाः सामाजिक संस्थातय्त परिचालन यायेगु निर्णय याःगु दु ।
बैठकय् माओवादीं आन्दोलनय् व्यवस्थापकीय कमीया कारणं छुं आन्दोलनकारीत बिरामी जुइमाःगु अवस्था वःगु धासें अज्याःगु अवस्था हानं वयेमबीत स्वयमसेवकतय्त इनाप याःगु दु ।
