आम हडतालया स्वन्हुया न्हि / थीथी थासय् तोडफोड
एकीकृत नेकपा (माओवादीं) यानाच्वंगु आम हडतालया स्वन्हुया न्हि येँ लगायत थीथी थासय् सामान्य तोडफोड व ल्वापु जूगु दु ।
मंगलवाः सुथय् माओवादी कार्यकर्तातय्सं येँया सतुंगलय् मोटरसाइकल तोडफोड यायेत स्वयेवं स्थानीयवासी व माओवादी कार्यकर्तात दथुइ ल्वापु जूगु खः । ल्वापुइ लानाः माओवादी कार्यकर्ता हीराबहादुर राना घाःपाः जूगु दु । रानायात बलम्वुइ च्वंगु सशस्त्र प्रहरी क्यम्पय् वासः याकातःगु दु ।
उखे नैकापय् माओवादी कार्यकर्तातय्त निंतिं यंकूगु लःया ट्यांकरयात स्थानीयवासीं पनेवं अन छुं ई तनावपूर्ण अवस्था वःगु खसां लिपा सुरक्षाकर्मीतय्सं स्थिति नियन्त्रणय् काःगु खः । अथेहे माओवादी कार्यकर्तातय्सं अनामनगरय् हडतालया इलय् पसः चायेकूगु धासें खुगू पसलय् तोडफोड याःगु दुसाः चुच्चेपाटीलय् नेसनल टेलिचिजनया छम्ह पत्रकारयात दाःगु दु ।
माओवादी कार्यकर्तातय्सं न्हिनसिया प्यता: इलंनिसें खुता: ई तक रिङरोड घेरे यानाः विरोध प्रदर्शन या:गु दु । ह्याउँगु वसः पुनातःपिं द्वलंद्वः माओवादीया कार्यकर्तातय्सं रिङरोड घेरे या:गु ख: । उकीयात माओवादी अध्यक्ष पुष्ककमल दाहाल 'प्रचण्डं', वरिष्ठ उपाध्यक्ष मोहन वैद्य, उपाध्यक्षत डा. बाबुराम भट्टराई, नारायाणकाजी श्रेष्ठ 'प्रकाश' लगायत नेतातय्सं ट्रकय् च्वना: परिक्रमा या:गु दु ।
मेमेगु थासय् माओवादी कार्यकर्तातय्सं सुथंनिसें नाराबाजी व सांस्कृतिक ज्याझ्वः यानाः विरोध प्रदर्शन याःगु दु । येँया कलंकी, गोंगबु, बालाजु, रत्नपार्क, पद्मोदयमोड, सुन्धानर, न्हू बानेश्वर नापं यलया कुपण्डोल, सातदोबाटो लगायत थासय् उमिसं प्रदर्शन याःगु खः ।
