फोरम शीर्ष नेतातय्सं माओवादीयात नापलात

मधेशी जनअधिकार फोरमया शीर्ष नेतातय्सं आन्दोलनरत एकीकृत नेकपा (माओवादी)या अध्यक्ष पुष्पकमल दाहाल 'प्रचण्ड'यात नापलाना खँल्हाबंला याःगु दु ।

मंगलवाः सुथय् फोरमया अध्यक्ष उपेन्द्र यादव व सहअध्यक्ष जयप्रकाशप्रसाद गुप्तां माओवादी अध्यक्षयात नापलाना राजनीतिक गतिरोधया बारे खँल्हाबंला याःगु खः । नेतात दथुइ याकनं आन्दोलनयात क्वचायेकाः राजनीतिक गतिरोधया समाधान यायेगु बारे नं खँ जूगु खः ।

खँल्हाबंला लिपा फोरम सहअध्यक्ष गुप्तां निगूलिं पक्षं लचकता क्यनेगु खःसा सहमति जुइगु कनादिसें राजनीतिक गतिरोध याकनं चीकेगु बारे सहलह जूगु कनादिल । प्रधानमन्त्रीया राजीनामा माग यानाः माओवादीं यानाच्वंगु अनिश्चिताकालीन आम हड्तालयात नैतिक समर्थन यानाच्वंगु फोरमं माओवादी नाप मंगलवाः याःगु खँल्हाबंलायात अर्थपूर्ण रुपं काःगु दु ।