आमहडताल बाध्यता : प्रचण्ड
नेवाःतय् कुहांवसाः याकनं हे आन्दोलन सफल जुइ : भट्टराई
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' आमहडताल बाध्यता जूगु खँ धयादीगु दु । वय्कलं आमहडताल थःपिनिगु चाहना मखुगु धयादिसें थुकीयात ताः ई तक निरन्तर न्ह्याकेगु इच्छा मदुगु धयादिल ।
नेपाल पत्रकार महासंघ व मिडिया सोसाइटीया पदाधिकारीत नाप सोमवाः जूगु खँल्हाबंलाय् वय्कलं माओवादी आन्दोलनं माओवादी शान्तिया पक्षय् दुगु व जनमत माओवादीया पक्षय् दुगु पुष्टि जूगु धयादिल । माओवादी आन्दोलन हिंसात्मक जुइ धाइपिंत थ्व छगू लिसः छगू दावी वय्कलं यानादिल ।
उखे येँया लुँहितीइ जूगु सभायात सम्बोधन यानादिसें माओवादी उपाध्यक्ष डा. बाबुराम भट्टराईं स्वनिगःया नेवाःत कुहांवसाः आन्दोलन याकनं हे सफल जुइगु धयादिसें नेवाःत कुहांवसाः आन्दोलनयात ताःहाके म्वालीगु धयादिल । वय्कलं नेवाःतय्त आन्दोलनय् कुहांवयाः ग्वहालि यायेत नं इनाप यानादिल ।
वय्कलं थःपिनिगु मागया सुनुवाई मजूसाः थ्वस्वयां नं तःच्वःगु आन्दोलन यायेगु ख्याच्वः बियादिल । माओवादीया धैर्यता समाप्त जुसाः सरकारयात सिंहदरवारं पितिनाछ्वयेगु ख्याच्वः बियादिसें वय्कलं जनताया धैर्यता समाप्त जुसाः सतकं हे जनसंविधान जारी यायेगु धयादिल ।
अथेहे वय्कलं माओवादीं सत्ताया खँल्हाःगु गन नं सुस्केमाःगु मदुगु धयादिसें माओवादीं निसः व न्यय्दँ न्ह्यः निसें उत्पीडनय् लाःपिं उत्पीडिततय् सत्ताया खँल्हाःगु धयादिल । अथेहे सभाय् माओवादी नेतात वर्षमान पुन 'अनन्त', लोकेन्द्र विष्ट, राम कार्की लगायतं सम्बोधन यानादीगु खः ।
सोमवाः हे येँया न्हू बानेश्वरय् पार्टी उपाध्यक्ष नारायणकाजी श्रेष्ठ 'प्रकाश', केशरमहलय् प्रवक्ता दिनानाथ शर्मा, पद्मोदयमोडय् नेत्रविक्रम चन्द, गौशालाय् विदेश विभाग प्रमुख कृष्ण बहादुर महरा व यलया कुपण्डोलय् पम्फा भुसाल व देव गुरुङं सम्बोधन यानादीगु खः ।
