सत्ता समर्थीत दलं हानं हडताल लितकायेत इनाप
सत्ता समर्थीत झिगू दलं आन्दोलनरत एनेकपा (माओवादी)यात हानं आमहडताल लितकायेत इनाप याःगु दु ।
प्रधानमन्त्री निवास बालुवाटारय् च्वंगु झिगू दलया बैठकं माओवादीया हडतालं जनजीवनय् नकारात्मक लिच्वः धासें हडतला लितकयाः वार्ताया माध्यमं समस्या समाधान यायेत इनाप याःगु दु । अथेहे बैठकय् झिगू दलं वर्तमान सरकार प्रति थःपिनिगु समर्थन दुगु धासें प्रधानमन्त्री माधवकुमार नेपालं राजीनामा बीमज्यूगु निर्णय याःगु खः ।
बैठकं सरकार परिवर्तन संवैधानिक व विधिसम्मत रुपय् जक हिलेफइगु ठहर यासें सतकं सरकार हिलेमफइगु खँ धाःगु दु । नापं माओवादी राजनीतिक पार्टीलय् रुपान्तरण जुयाः माओवादी लडाकुया समायोजन व पुनःस्थापना यानाः शान्ति प्रकृयायात पूर्णताय् थ्यंकेगु, वाइसीएलया अर्धसैन्य संरचना विघटन यायेगु, कब्जा यानातःगु छेँबुँ लितबीगु लगायतया बारे ठोस सहमति जुसाः दक्वं विषयलय् राष्ट्रिय सहमति कायम यायेफइगु खँ धाःगु दु ।
बैठकय् प्रधानमन्त्री नेपाल, नेकपा(एमाले)या महासचिव ईश्वर पोखरेल, नेता केपी ओली, नेपाली कांग्रेसया कार्यवाहक सभापति सुशील कोइराला, कांग्रेस संसदीय दलया नेता रामचन्द्र पौडेल, मधेसी जनअधिकार फोरम(लोकतान्त्रिक)या अध्यक्ष विजय गच्छदार, तराई मधेश लोकतान्त्रिक पार्टीया अध्यक्ष महन्थ ठाकुर, सद्भावना पार्टीया अध्यक्ष राजेन्द्र महतो, नेकपा (माले)या महासचिव सी.पी. मैनाली, राष्ट्रिय प्रजातन्त्र पार्टीया अध्यक्ष पशुपति शमशेर राणा, नेकपा(संयुक्त)या अध्यक्ष चन्द्रदेव जोशी, राष्ट्रिय जनशक्ति पार्टीया अध्यक्ष सूर्य बहादुर थापा, समाजवादी प्रजातान्त्रिक जनता दलया अध्यक्ष प्रेम बहादुर सिंहया उपस्थित दुगु ख: ।
