वामदेवयात ज्यान कायेगु धम्की
येँ (सन्ध्या टाइम्स)/प्रधानमन्त्री माधवकुमार नेपालं राजीनामा बीमाः धइगु माग यासें एमालेया हे ६० म्ह नेता व कार्यकर्तापाखें पार्टी अध्यक्ष झलनाथ खनालयात ज्ञापन पत्र बीगु ज्याया नेतृत्व यानादीम्ह एमालेया उपाध्यक्ष वामदेव गौतमयात ज्यान कायेगु ख्याच्वः वःगु दु ।
वय्कःया थःगु हे पार्टी एमालेया भ्रातृ संगठन युथ फोर्सया कार्यकर्तातय्सं वंगु चान्हय् वय्कःयात निक्वः तक टेलिफोन यानाः ज्यान कायेगु ख्याच्वः बिया हःगु खँ वय्कलं कनादीगु दु ।
नेता वामदेवं धयादिल, 'जितः म्हिगः चान्हय् निकः तक फोन यानाः युथ फोर्सया कार्यकर्ता धाःपिंसं छुं दिंया दुने स्याना बी' धकाः ख्याच्वः बियाहःगु दु ।'
उखे एमाले समर्थित युवा संघया नायः महेश बस्नेतं धाःसा थःपिनिपाखें सुनानं पार्टी उपाध्यक्षयात ज्यान कायेगु धकाः ख्याच्वः मबिउगु दावी यानादीगु दु ।
युथ फोर्सयात एमाले नेता केपी शर्मा ओलीया पकडय् दुगु संगठन कथं कयातःगु दु। उपाध्यक्ष वामदेव गौतमं म्हिगः पार्टी अध्यक्ष खनालयात ६० म्ह दुजःतय् थ्व ज्ञापनपत्र बीवं म्हिगः हे खड्ग ओलीं अज्याःगु ज्ञापनपत्र बिउम्ह वामदेव गौतमयात कारवाही यायेमाः धकाः अभिव्यक्ति बियादीगु खः।
वामदेव गौतमया नेतृत्वय् म्हिगः पार्टी अध्यक्षयात बिउगु उगु ज्ञापनपत्रयात अध्यक्ष खनालं गलत प्रक्रियां वःगु ज्या धकाः टिप्पणी यानादीगु खः। उगु ज्ञापनपत्रय् हस्ताक्षर याःपिं छुं नेतातय्सं उकी थःपिनि ल्हाःचिं खुया काःगु धकाः धयाहःगु दु ।
