स्थानीय निकायया मूलुखाय् तालं
येँ (सन्ध्या टाइम्स)/माओवादीं आह्वान याःगु आमहडतालया झ्वलय् माओवादीलिसे सतीगु नेपाल राष्ट्रिय कर्मचारी संगठन स्थानीय निकायया कर्मचारीतय्सं देय्न्यंकंया स्थानीय निकायया गेटय् हे तालं ग्वया बिउगु दु। उगु संगठनया कर्मचारीतय्सं येँ महानगरपालिका, यल उप महानगरपालिका, किपू नगरपालिका नापं देय्न्यंकंया गाविसया गेटय् तालं ग्वयागु दु धकाः धाःगु दु ।
शान्ति व न्हूगु संविधानया नितिं वर्तमान सरकार पंगः जुयाच्वंगुलिं सरकारयात विघटन याना राष्ट्रिय सहमतिया सरकार दयेकेमाःगु माग थौं फुक्क नेपाःमि जनताया जूगुलिं थःपिंसं नं माओवादीया अनिश्चितकालीन आमहडतालयात समर्थन यानाः देय्न्यंकंया स्थानीय निकायया मूलुखाय् तालं ग्वयागु खँ उगु कर्मचारी संगठनया महासचिव सुजिन्द्र महर्जनं धयादीगु दु ।
उगु संगठनया कर्मचारीत आःया आमहडतालय् सक्रिय जुयाः ब्वति कयाच्वंगु दु ।
