यलय् दछियंकंया बुद्ध जयन्ती ज्याझ्वः क्वचाल
यल (सन्ध्या टाइम्स)/२५५४ क्वःगु बुद्ध जयन्ती तःजिक हनेगु झ्वलय् यलय् वंगु दछि न्ह्यवंनिसें न्ह्याना वयाच्वंगु ज्याझ्वः क्वचाल। वंगु नीन्यादँ न्ह्यः मैत्रीभाव ज्ञानमाला भजन खलः नीस्वनाः बुद्ध जयन्ती पर्व तःजिक न्यायेकूगु वैशवर्ण महाविहार गुजिबहालं न्हापा पाः काःगु २५ दँ दुगु लसताय् थुगुसी रजत महोत्सव कथं न्यायेकेत ग्वसाः खलकं वंगु दछि न्ह्यवंनिसें पुन्हि पतिकं स्वनिगःया थीथी ज्ञानमाला भजन प्रस्तुत व बौद्ध विद्वानपिंपाखें प्रवचन ज्याझ्वः न्ह्याका वयाच्वंगु खःसा वंगु अनला पुन्हि कुन्हु थ्व ज्याझ्वः क्वचायेकूगु खः ।
ग्वसाः खलःया नायः जगतमुनि शाक्यया सभापतित्वय् जूगु उगु ज्याझ्वलय् गुजिबहाःपाखें पिकाःगु ज्ञानमाला सफूया विमोचन स्वक्वः जंक्व सिधःपिं अजिपिं लक्ष्मीमाया, चन्द्रमाया व अष्टमाया शाक्यपिंसं यानादीगु खः। ज्याझ्वलय् ज्ञानमाला भजनया गुरुपिं रत्नलाल नकःमि, रत्नराज शाक्य, उद्घोषण प्रशिक्षक बुद्धरत्न स्थापितयात नं हनेज्या जूगु खः।
रविसन शाक्यं लसकुस यासें न्ह्याकूगु ज्याझ्वलय् बौद्ध विद्वान सुर्यमान वज्राचार्यं अनला पुन्हिया महत्व बारे कनादीगु खः। ज्याझ्वलय् उद्घोषण कलाया प्रशिक्षार्थीपिंत मू पाहां लिपि विशेषज्ञ लोकराज शाक्यं दसिपौ लःल्हानादीगु खः ।
