आम हडतालया निन्हुया न्हि / देय्न्यंकया जनजीवन प्रभावित
शान्ति व संविधानया निंतिं थःगु नेतृत्वय् राष्ट्रिय सहमतिया सरकार गठन यायेमाःगु माग यासें एकीकृत नेकपा (माओवादीं) याःगु आम हडतालया कारणं देय्न्यंया जनजीवन प्रभावित जूगु दु । आम हडतालया न्हिन्हुया न्हि नं देय्न्यंकया शिक्षण संस्था, कलकारखाना, यातायात, ज्याकू आदि दक्वं ठप्प जूगु दु ।
आम हडतालया न्हिन्हुया न्हि नं प्रदर्शन शान्तिपूर्ण जूगु दु । येँया गोंगबु र चावहीली व मेगू छुंछुं थासय् धाःसा सामान्य ल्वापु व तोडफोड जूगु दु । सोमवा: सनिलय् गोंगबुलय् छम्ह यात्रुं गयाव:गु मोटरसाइकलयात माओवादी कार्यकर्तां नियन्त्रणय् कया: च्याकेत स्वयेवं माओवादी व प्रहरी दथुइ अप्पां कयेका: ल्वापु जूगु ख: । उगु इलय् भीड तितरबितर यायेत प्रहरीं प्यंगू राउण्ड ग्यास अश्रुग्यास व निगू राउन्ड हवाइ फायर या:गु ख: । अथेहे चाबहिलीया चुच्चेपाटी नं सनिलय् चलेजूगु स्वंग: मोटरसाइकलय् आन्दोलनकारीतय्सं आक्रमण यायेत स्वयेवं प्रहरीं हस्तक्षेप या:गु ख: ।
माओवादी कार्यकर्तातय्सं सुथंनिसें येँ लगायत देय्न्यंकया न्हय्न्यागूलिं जिल्लाय् प्रदर्शन याःगु दु । माओवादीं स्वनिगःया थीथी झिंच्यागू थासय् सुथंनिसें जम्मा जुयाः सांस्कृतिक ज्याझ्वः नापं सरकारी विरोधी नाराबाजी याःगु खः । माओवादी केन्द्रीय स्तरया नेतातय् नेतृत्वय् दुगु प्रदर्शनकारीत वर्तमान सरकार विघटन जुइमाःगु माग यासें जुलुस पिथना थीथी लागा चाहीउगु खः ।
माओवादी कार्यकर्तातय्सं स्वनिगःया मूमू सतक न्हू बानेश्वर, कोटेश्वर, त्रिपुरश्वर, कलंकी, रत्नपार्क, सुन्धारा, सातदोबाटो, कुपण्डोल, गोंगबु, चावहिली, महारजगंज लगायत थासय् सुथंनिसें प्रदर्शन याःगु खः । त्रिपुरेश्वरय् धा:सा गणतान्त्रिक खेलकुद मञ्चं कराते धेंधेंबल्ला याना: विरोध प्रदर्शन या:गु खः ।
स्वनिगः पिने माओवादी कार्यकर्तातय्सं बन्दया इलय् बैंक च्यायेकूगु धकाः बुटवलय् राष्ट्रिय वाणिज्य बैंकय् तोडफोड याःगु दु । तोडफोडया कारणं बैंकया फर्निचर व झ्या: तज्या:गु दु ।
उखे रुपन्देहीलय् माओवादीं हडतालय् मोटरसाइकल चलेयाःगु धासें निगः मोटरसाइकल च्याकाः म्हिग: बहनी ब्यूगु दु । म्हिग बहनी माओवादी कार्यकर्तातय्सं निगः मोटरसाइकल च्याकाः ब्यूगु धासें प्रहरीं थौं रुपन्देहीया खैरेनीं झिंछम्ह माओवादी कार्यकर्तायात ज्वना यंकूगु दु ।
म्हिग हडतालया न्हि कुन्हु नं जाँच संचालन याःगु धकाः प्रहरी व प्रदर्शनकारी दथुइ ल्वापु जूगु चितवनय् थौं शान्तिपूर्ण प्रदर्शन जूगु दु । माओवादी कार्यकर्तातय्सं अन सुथंनिसें नाराबाजी यासें प्रदर्शन याःगु खः ।
बन्दया अवज्ञा याःगु धासें माओवादी कार्यकर्तातय्सं सुनसरीया धरानय् मोटरसाइकल दिकेगु झ्वलय् स्थानीय युवातय्सं माओवादी कार्यकर्तायात आक्रमण याःगु दु । आक्रमणय् लानाः माओवादी कार्यकर्ता प्रविण राई घाःपाः जूगु दु । घाःपाः जुम्ह राईयात विपि कोइराला स्वास्थ्य विज्ञान प्रतिष्ठानय् वासः याकातःगु दु ।
उखे पोखराया पृथ्वीचोकय् चायेकातःगु छगू वासः पलसय् माओवादी कार्यकार्तातय्सं तोडफोड यायेवं छम्ह मचा नापं निम्ह घाःपाः जूगु दु । अथेहे पृथ्वी चोकय् हे च्वंगु शिशुवा मेडिकल हल, कृत्तन फुड्स सप्लायर्स लगायत न्यागू पसलय् तोडफोड याःगु दु ।
आम हडताल जुसां बाजुराय् धाःसा उकीया प्रभाव तसकं म्हो जक लाःगु दु । अन सरकारी ज्याकू नापं शिक्षण संस्था चाःगु दु । सवारी साधनय् धाःसा हडतालया प्रभाव लाःगु खनेदत ।
नवलपरासी, जनकपुर, पर्सा, इनरुवा लगायत थासय् आम हडतालया न्हिन्हुया न्हि नं शान्तिपूर्ण प्रदर्शन जूगु दुसाः अनया जनजीवन प्रभावित जूगु दु ।
