गौतमनाप स्पष्टिकरण काइगु
नेकपा (एमाले) अनुशासन आयोगं पार्टी विधान व पार्टी नीति विपरित ज्या याःगु ठहर यासें उपाध्यक्ष बामदेव गौतमनाप स्पष्टिकरण कायेगु निर्णय याःगु दु ।
सोमवाः पार्टी ज्याकू बल्खुइ च्वंगु अनुशासन आयोगया बैठकं पार्टी विधान व नीति विपरित गौतमं प्रधानमन्त्रीया राजीनमा फ्वंगु धासें उकीया बारे स्पष्टिकारण कायेगु निर्णय याःगु खः । पार्टी दुने सहलहया सम्भावना पर्याप्त दुगु खःसां नं सार्वजनिक रुपं ज्ञापनपत्र बिया प्रधानमन्त्रीया राजीनामा फ्वंगुलिं आयोगं स्पष्टिकरण कायेगु निर्णय याःगु खः ।
उपाध्यक्ष गौतमं प्रधानमन्त्रीं राष्ट्रया नांमय् बियादीगु सम्बोधनं देय्यात मुठभेडया राजनीति पाखे यंकूगु धासें पार्टीया मेपिं न्यय्गुम्ह नेतात सहित प्रधानमन्त्रीं राजीनामा बीमाःगु धासें पार्टी अध्यक्षयात ज्ञापनपत्र लःल्हाःगु खः ।
अथेहे आयोगया बैठकय् ज्ञापनपत्रय् नां दुपिं छुंछुं नेतातय्सं थःपिनिगु सहमति बिना ज्ञापनपत्रय् नां दुथ्याकूगु नापं उपाध्यक्ष गौतमयात स्यायेगु धकाः वःगु धम्कीया बारे नं सहलह जूगु खः ।
