थःथःगु अडान कायम यायेवं बैठक निष्कर्षबिहीन
सत्तारुढ नेकपा (एमाले) व प्रमुख प्रतिपक्षी दल एनेकपा (माओवादी) दथुइ गतिरोध समाधान यायेत च्वंगु बैठकय् निगूलिं दलं थःथःगु पार्टीया अडान मत्वतेवं बैठक निष्कर्षबिहीन जूगु दु ।
एमाले अध्यक्ष झलनाथ खनालया डल्लुइ च्वंगु छेँय् च्वंगू निगूलिं दलया शीर्षस्थ नेतातय् बैठकय् माओवादीं शान्ति व संविधान सुनिश्चिताया निंतिं राष्ट्रिय सरकार गठन यायेमाःगुलिं प्रधानमन्त्री माधवकुमार नेपालं राजीनामा बीमाःगु अडान का:गु खः । अथेहे एमालें माओवादी न्हापा आन्दोलन त्वःता सहमतिलय् वयेत इनाप यासें सहमति लिपा प्रधानमन्त्रीं राजीनामा बीगु अडान काःगु खः ।
बैठक लिपा माओवादी उपाध्यक्ष नारायणकाजी श्रेष्ठ 'प्रकाशं' आन्दोलन सहमतिया निंतिं दबाव बीत जूगुलिं सहमति मजुतल्ले आन्दोलन लितमकायेगु धयादिल । अथेहे एमाले सचिव विष्णु पौडेलं सहमतिया निंतिं माओवादीं न्हापा आन्दोलन लितकायेमाःगु धयादिल ।
बैठकय् एमाले अध्यक्ष झलनाथ खनाल, महासचिव इश्वर पोखरेल, सचिव विष्णु पौडेल व नेता भरतमोहन अधिकारीया ब्वति दुगु खःसा माओवादी पाखें अध्यक्ष पुष्पकमल दाहाल 'प्रचण्ड', वरिष्ठ नेता मोहन वैद्य व उपाध्यक्षत डा. बाबुराम भट्टराई व नारायणकाजी श्रेष्ठया उपस्थिति दुगु खः ।
