जित स्यायेगु धम्की वल : गौतम
नेकपा (एमाले)या उपाध्यक्ष बामदेव गौतमं थःयात स्यायेगु धम्की वःगु खँ धयादीगु दु । एमालेया हे वरिष्ठ नेता जुयादीम्ह प्रधानमन्त्री माधवकुमार नेपालया राजीनामा माग यासें पार्टी अध्यक्ष झलनाथ खनालयात ज्ञापनपत्र ब्यूगुलिं थःयात स्यायेगु धम्की वःगु खँ वय्कलं धयादीगु दु ।
सोमवाः सुथय् नेपाल एफएम नाप खँल्हाबंला यानादिसें उपाध्यक्ष गौतमं म्हिग बहनी म्हमस्यूगु टेलिफोन नम्बरं फोन यानाः थःत युथ फोर्सया कार्यकर्तातय्सं अज्याःगु धम्की वःगु धयादिल । वय्कलं पार्टी शीर्ष नेतातय् निर्देशनय् हे युथ फोर्सया कार्यकर्तात पाखें अज्याःगु धम्की वःगु दावी यानादिल ।
वय्कलं राजनीतिक अवस्था तसकं जटिल जूगु व प्रधानमन्त्रीं राजीनामा मबीया देय्यात गृहयुद्धय् यंकेत स्वःगुलिं थःपिंसं पार्टी अध्यक्षया ध्यानाकर्षण यानागु धयादिल । एमाले उपाध्यक्ष गौतम लगयात खुइम्ह नेतातय्सं प्रधानमन्त्रीं राजीनामा बीया राजनीतिक निकास बीमाःगु धासें पार्टी अध्यक्षयात ज्ञापनपत्र लःल्हाःगु खः ।
उखे युथ फोर्सं धाःसाः अज्याःगु धम्की थःपिनिगु कार्यकर्तातय् संलग्नता मदुगु धासें द्वपंया खण्डन याःगु दु ।
