शीर्ष नेतातय् बैठक सहमति बिहीन
स्वंगू प्रमुख दलया शीर्ष नेतात दथुइ आइतवाः बहनी च्वंगु बैठक निष्कर्षबिहीन जूगु दु । दलत दथुइ मुख्यतया राष्ट्रिय सहमतिया सरकार गठन बारे सहमति जुइमफेवं निष्कर्ष बिहीन जूगु खः ।
येँया लाजिम्पाटय् दुगु होटेल र्याडिसनय् जूगु वार्ताय् कांग्रेस व एमालें माओवादीयात न्हापा आन्दोलन लितकायेमाःगु माग याःगु खःसा माओवादीं सहमति मजुतल्ले आन्दोलन लितमकायेगु व प्रधानमन्त्री माधवकुमार नेपालं राजीनामा बीमाःगु माग याःगु खः ।
बैठक लिपा माओवादी अध्यक्ष पुष्पकमल दाहाल 'प्रचण्डं' म्हिग स्वंगू दलीय कार्यदलं याःगु सहलहया विषयलय् हे शीर्ष नेतातय् बैठक सहलह जूगु कनादिल । एमाले अध्यक्ष झलनाथ खनालं नं स्वंगू दलयी कार्यदलं तयार याःगु खगू बुँदे एजेण्डाय् सहलह जूगु धयादिसें सहमतिया निंतिं जुयाच्वंगु कुतः सकारात्मक जुयाच्वंगु धयादिल ।
उगु इलय् पत्रकारतय्सं प्रधानमन्त्रीं राजीनामा बीला धकाः कांग्रेस कार्यवहाक सभापतियात न्यंगु इलय् वय्कलं कांग्रेसं वर्तमान सरकारयात हे समर्थन यानाच्वंगुलिं प्रधानमन्त्री राजीनमा मबीगु धयादिल । कोइरालाया अज्याःगु अभिव्यक्ति वयेवं अन हे प्रचण्डं आन्दोलनया अझ तच्वयेकेमाःगु धयादिल ।
बैठकय् माओवादी अध्यक्ष प्रचण्ड व उपाध्यक्ष डा. बाबुराम भट्टराई, कांग्रेसया पाखें कार्यवहाक सभापति सुशील कोइराला व डा. रामशरण महत व एमाले पाखें अध्यक्ष झलनाथ खनाल व भरतमोहन अधिकारीया ब्वति दुगु खः ।
थौं बैठकय् सहमति जुइमफेवं कन्हय् हानं शीर्ष नेतातय् बैठक च्वनीगु जूगु दु ।
