राष्ट्रपति व प्रधानमन्त्री दथुइ खँल्हाबंला

प्रधानमन्त्री माधवकुमार नेपालं लिप्पांगु घटनाक्रमया बारे राष्ट्रपति डा. रामवरण यादवयात जानकारी बियादीगु दु ।

आइतवाः सनिलय् राष्ट्रपति निवास थ्यंका प्रधानमन्त्री नेपालं भुटानया राजधानी थिम्पुलय् जूगु झिंखुक्वःगु दक्षिण एसियालि सहयोग संगठन (सार्क)या झ्वलय् सार्क दुजःया राष्ट्र प्रमुख व सरकार प्रमुखत दथुइ जूगु द्विपक्षीय व वहुपक्षीय वार्ताया बारे जानकारी यानादीगु खः ।

अथेहे प्रधानमन्त्री नेपालं वर्तमान राजनीतिक परिस्थितिया बारे नं राष्ट्रपतियात जानकारी बियादीगु खः । वय्कलं देय्या शान्ति सुरक्षाया अवस्था सन्तोषजनक जूगु धयादिसें माओवादी आन्दोनयात सरकारं धैर्य व संयमताया साथ स्वयाच्वंगु धयादिल ।

उगु इलय् राष्ट्रपति यादवं दलत मिलेजुया न्ह्याः वनेत सुझाव बियादीगु खः ।