सेनाया संयमता व धैर्यतायात कमजोरी कथं मकायेत इनाप
नेपाली सेनां व्यक्तिगत ज्याय् वनाच्वंगु इलय् सुराकीया द्वपं बिया सेनाया जवानयात ज्वन प्रहरीयात लःल्हाःगु घटना प्रति आपत्ति प्वंकूगु दु ।
सैनिक जनसम्पर्क निर्देशनालयं आइतवाः छगू विज्ञप्ति पिथना मखुगू द्वपं बिया व जवरवस्ती ज्वना सैनिक जवानया व्यक्तिगत इज्जत व नेपाली सेनाया प्रतिष्ठाय् तकं आंच वइगु ज्या प्रति नेपाली सेनाया गम्भीर ध्यानाकर्षण जूगु खँ धाःगु दु ।
विज्ञप्तिइ नेपाली सेनया धैर्यता व संयमताया कमजोरी कथं मकायेत आन्दोलनकारीतय्त इनाप याःगु दु । अथेहे हानं अज्याःगु घटना जूसाः नेपाली सेनाया दुजःतय् सुरक्षाया निंतिं घटना स्थलं हे उद्धार यायेगु खँ धाःगु दु ।
छुं दिं न्ह्यः माओवादीं सैनिक जवानत रामकुमार खड्का व देवबहादुर विष्टयात जासुसीया द्वपं बियाः प्रहरीयात लःल्हाःगु खः । अथेहे पुलांम्ह अमल्दार रमेश हमालयात नं ज्वना प्रहरीयात लःल्हाःगु खः ।
