'माओवादी आन्दोलन जनताया नेतृत्व दुगु सरकारया निंतिं'
एकीकृत नेकपा (माओवादी)या उपाध्यक्ष डा. बाबुराम भट्टराईं माओवादीयां यानाच्वंगु आन्दोलन जनताया नेतृत्वय् दुगु सरकार स्थापना यायेगु निंतिं केन्द्रीत जूगु खँ धयादीगु दु । वय्कलं मेमेगू दलं माओवादी आन्दोलन सत्ता केन्द्रीत जुल धकाः द्वपं बियाच्वंगु धयादिसें माओवादीं विदेशी दलाल व जनता पाखें पराजित मनतूत चीकाः देय्यात माया याइपिं जनताया नेतृत्वय् दुगु सरकारया निंतिं आन्दोलन यानाच्वंगु धयादिल ।
आम हड्तालया न्हापांगु न्हि माओवादीं येँया न्हू बानेश्वरय् याःगु सभायात सम्बोधन यानादिसें वय्कलं थ्व जनताया अन्तिम लडाईं जूगु धयादिसें जनताया दक्वं माग पूमवंकं थ्व आन्दोलनं दिपा मकाइगु धयादिल । माओवादीं जनताया एजेण्डा ल्ह्वनीगु तर दथुइ हे त्वःतिगु गुनासो जनता पाखें वःगु धयादिसें वय्कलं आन्दोलनं अन्तिम विजय हासिल मयातल्ले थः कार्यकर्तातय् स्वनिगः मत्वःतेत इनाप यानादिल । तर वय्कलं आन्दोलन जुसां संवादया लुखा न्ह्यावलें चालाच्वंगु धयादिल ।
जनतां शुरु याःगु महान आन्दोलनया न्ह्यने वर्तमान कतामरी सरकार याकनं हे क्वछुइगु दावी यानादिसें वय्कलं शान्ति व संविधानया सुनिश्चिता मदुतल्ले आन्दोलन जारी तयेगुया विकल्प मदुगु धयादिल । वय्कलं सेना छ्यला सरकारया आयु ताःहाकेगु कुतः जुयाच्वंसां व असफल जुइगु धयादिसें जनतां न्ह्याकेधुंकूगु सतक आन्दोलनं कतामरी सरकार क्वथलाः हे त्वःतेगु दावी यानादिल ।
