प्रम विरुद्ध ६० म्ह एमाले नेतातय् हस्ताक्षर
येँ (सन्ध्या टाइम्स)/नेकपा (एमाले)या उपाध्यक्ष वामदेव गौतम नापं ६० म्ह केन्द्रीय नेतातय्सं प्रधानमन्त्री माधवकुमार नेपालं तत्काल राजीनामा बीमाः धइगु माग यासें पार्टी अध्यक्ष झलनाथ खनालयात ज्ञापनपत्र लःल्हाःगु दु ।
म्हिगः बहनी प्रधानमन्त्री नेपालं राष्ट्रया नामय् बियादीगु संवोधनं देय्यात भिडन्तय् यंकीगु ठहर यासें आः प्रम नेपालं राजीनामा बियाः निकासया लँपु चायेका बीमाः धासें उगु ज्ञापनपत्र बिउगु खः ।
ज्ञापनपतिइ एमाले उपाध्यक्ष बामदेव गौतम नापं ख्वीम्ह केन्द्रीय दुजःतय्सं ल्हाःचिं तयातःगु खः। उकी केन्द्रीय नेता राजेन्द्र श्रेष्ठ, सावित्रा भुसाल, साहना प्रधान लगायतया नेतातय्गु हस्ताक्षर दु। ज्ञापनपतिइ 'प्रधानमन्त्री माधव कुमार नेपालं राष्ट्रया नामय् संवोधन यानाः राष्ट्रिय सहमतिया वातावरण दयेकेगु सिबें देय्यात ल्वापुइ यंकेगु अभिब्यक्ति बियादिल। उगु अभिब्यक्तिपाखें प्रधानमन्त्रीं देय्यात गृहयुद्धपाखे घ्वाना छ्वयेत्यंगु खनेदु। थ्व तसकं गम्भीर खँ खः। जिमिसं प्रधानमन्त्री कमरेड माधवकुमार नेपालं तुरुन्त राजीनामा बियाः राष्ट्रिय सहमतिया निंतिं लँपु चायेकेत माग यानाच्वना। थुकिया निंतिं माःगु कथंया पहल यायेत पार्टीया अध्यक्ष कमरेड झलनाथ खनालजुयात ग्रम्भीर ध्यानाकर्षण यानाच्वना' धकाः न्ह्यथनाच्वंगु दु ।
