थीथी जिल्लाय् १२ कक्षाया परीक्षा स्थगित
येँ (सन्ध्या टाइम्स)/माओवादीया आमहडतालं यानाः थौं थीथी जिल्लाय् जुइमाःगु १२ कक्षाया परीक्षा तकं स्थगित जूवंगु दु। बन्दं यानाः येँया ग्वंगःबुँया पासाङ ल्हामु मेमोरियल व डिल्लीबजाःया क्यापिटल हिल परीक्षा केन्द्रया परीक्षा स्थगित जूगु दु। अथे हे डडेलधुरा, बाग्लुङ, दाङ, पाल्पा, रुपन्देहीया फुक्क परीक्षा नं स्थगित जूगु दु ।
कास्कीया २० गू केन्द्र मध्ये १७ गू केन्द्रया परीक्षा अखिल क्रान्तिकारीं स्थगित याना बिउगु दु। अन प्रहरीलिसे ल्वापु नं जूगु दुसा उकी लानाः प्रहरी जवान पुस्कर कुँवर घाःपाः जूगु दु। चितवनया २१ मध्ये ६, बर्दियाया गुलरीयाय् ८ मध्ये २, रौतहटया ११ मध्ये ३, गुल्मीया ११ मध्ये ३, गार्खाया ५ मध्ये ४, पर्वतया ७ मध्ये ३ व मुगुया २ मध्ये १ परीक्षा केन्द्रय् परीक्षा स्थगित जूगु दु। अथे हे स्याङजा, तनहुँ, लमजुङ, बारा, पर्सा, मनाङ, मुस्ताङ, रोल्पा, सल्यान, प्यूठान लगायतया थासय् नं परीक्षा स्थगित जूगु दु। उच्च माध्यमिक शिक्षा परिषदं स्थगित जूगु थासय् मेगु हे तालिका पिकयाः लिपा परीक्षा कायेगु जुइ धाःगु दु ।
