आम हड्तालया न्हापांगु न्हि शान्तिपूर्ण प्रदर्शन

आम हड्तालया न्हापांगु न्हि एकीकृत नेकपा (माओवादीं) राजधानी येँ नापं देय्न्यंक प्रदर्शन या:गु दु । देय्या थीथी थासं जुलुस पिथना सरकार विघटनया माग याना: न्ह्या:गु जुलुस शान्तिपूर्ण रुपं जुसां छुंछुं थासय् समान्य ल्वापु व तोडफोड जूगु दु ।

आम हड्तालं यानाः देय्न्यंकया पसः, कलकारखाना, शिक्षण संस्था, ज्याकू दक्वं पूर्णरुपं ठप्प जूगु दुसाः जनजीवन प्रभावित जूगु दु । शान्ति व संविधानया निंतिं राष्ट्रिय सहमतिया सरकार गठन जुइमाःगु माग यासें माओवादीं थनिनिसें आम हड्तालया घोषणा याःगु खः ।

आइतवाः सुथंनिसें द्वलंद्व माओवादी कार्यकर्तातय्सं येँया थीथी थासय् प्रदर्शन यानाच्वंगु दु । येँया न्हू बानेश्वर, चावहीली, गोंगबु, महाराजगंज, कलंकी, बल्खु, त्रिपुरेश्वर, गौशाला आदि थासय् केन्द्रीय नेतातय् नेतृत्वय् शान्तिपूर्ण प्रदर्शन जुयाच्वंगु दु ।

अथेहे प्रदर्शनय् नाराबाजी नापं म्ये, कविता वाचन आदि यायेगु ज्या नं जूगु दु । अथेहे सांस्कृतिक ज्याझ्वः व उकी दथुइ नेतातय्सं आन्दोलनया बारे थःथःगु नुगः खँ तयेगु ज्या या:गु दु । प्रदर्शनय् मानवअधिकारवादी संस्था, प्रेस, कुटनीटिक नियोग प्रहरी आदिया गाडिइ धाःसा छुं पंग थनेगु ज्या जूगु मदु ।

अथेहे स्वनिगलं पिने विराटनगरय् सुथंनिसें पिहांवगु जुलुसय् अनया थीथी थासय् शान्तिपूर्ण रुपं चाहिलाच्वंगु दु । आइतवाः सुथय् धाःसा माओवादी कार्यकर्तातय्सं आन्दोलनय् पसः चायेकूगु धासें तोडफोड यायेत स्वयेवं अनया स्थानीयवासीतय्सं माओवादीयात लिनाछ्वःगु खः । अथेहे माओवादी कार्यकर्तातय्सं बन्दया अवज्ञ याःगु धासें निगू सरकारी ज्याकूथी तोडफोड याःगु दु ।

वीरगंजय् माओवादी कार्यकर्तातय्सं याःगु आन्दोलनया झ्वलय् हिन्दूवादी युवातय्सं नेपाःयात हानं हिन्दू राज्य घोषणा यायेमाःगु माग यासें जुलुस पिथनेवं अन झडपया स्थिति ब्वलंगु खः । अथेहे अन घण्टाघरय् अज्ञात पुचलं तयातःगु बल लुइकूगु दु । माओवादी धाःसा थःपिनिगु माओवादीयात प्रभावित यायेत प्रतिगामीतय्सं बम तःगु द्वपं ब्यूगु दु ।

अथेहे चितवनया भरतपुरय् आन्दोलनया झ्वलय् नं १२ कक्षाया जाँच संचालन याःगु धासें प्रदर्शनकारीतय्सं विरोध यायेवं जूगु ल्वापुइ छम्ह पत्रकार, छम्ह प्रहरी, माओवादी कार्यकर्ता व विद्यार्थी यानाः छगू दर्जन घाःपाः जूगु दु ।

माओवादीं पोखराय् पिकाःगु आन्दोलनय् छेँया कसीं अप्पां क्येगूगु धासें प्रदर्शनकारीतय्सं स्वम्हेसिया छेँय् तोडफोड याःगु दु । प्रदर्शनकारीतय्सं शेरबहादुर क्षेत्री, अर्जुन सुनार व उषा श्रेष्ठया छेँय् तोडफोड याःगु खः ।

माओवादीं बुटवलय् बन्दया अवज्ञा याःगु धासें निगू ज्याकू व छगू पसलय् तोडफोड याःगु दु । तोडफोडय् लाना नेको इन्सुरेन्स व छगू पसलय् सामान्य क्षति जूगु दु । अन माओवादी कार्यकर्तातय्सं इलाका प्रशासन ज्याकू व खानेपानी ज्याकूथी नं तोडफोड यायेगु कुतः याःगु खः ।