ल्वाभः प्रदर्शन जुसाः सरकार सुम्क मच्वनीगु : चेम्जोङ
शान्ति व पुन निर्माण मन्त्री रकम चेम्जोङं शक्ति प्रदर्शनया नांमय् माओवादीं ल्वाभः प्रदर्शन यानाच्वंसाः सरकार सुम्क मच्वनीगु ख्याच्वः बियादीगु दु । सरकार तसकं लचकताया साथ शान्ति प्रकृयाया भावनायात पालना यायेत माओवादीयात इनाप यानाच्वंगु धयादिसें मन्त्री चेम्जोङं उकीयात बेवास्ता याःसा माओवादीयात हे बेफाइदा जुइगु धयादिल ।
आइतवाः धनकुटाय् पत्रकारत नाप खँल्हाबंला यानादिसें वय्कलं माओवादीं ल्वाभः प्रदर्शन याना जूगु ज्या विस्तृत शान्ति सम्झौता विपरीत जूगु धयादिसें अज्याःगु ज्या बन्द मयाःसा सरकारं बाध्यकारी पलाः यायेफइगु धयादिल ।
वय्कलं नेपाली सेनाय् भर्ना प्रकृया शान्ति सम्झौताया मर्म वपरीत मजूगु स्पष्ट यानादिसें थ्व आवश्यक प्रकृया जूगुलिं थुकीयात विरोध यानाच्वनेमाःगु आवश्यकता मदुगु धयादिल । वय्कलं संविधान निर्माण बारे राजनीतिक सहमति कायम जुसाः निर्धारित इलय् हे न्हूगु संविधान जारी जुइगु दाबी यानादिल ।
