आन्दोलन लित व प्रमया राजीनामा नापं : खनाल
ओली पाखें कारवाही ययोगु ख्याच्वः
नेकपा (एमाले)या अध्यक्ष झलनाथ खनालं समस्या समाधान यायेगु निंतिं सहमतिया विकल्प मदुगु धयादिसें माओवादीयात आन्दोलन लितकायेत इनाप यानादीगु दु । वय्कलं प्रधानमन्त्रीया राजीनामा न्हापा वा माओवादीं आन्दोलन लितकायेगु ज्या न्हापा यायेगु खँ स्वयां निगूलिं नापं जुइमाःगु धयादिल ।
एमाले उपाध्यक्ष वामदेव गौतम लगायात खुइम्ह नेताय्सं प्रधानमन्त्री माधवकुमार नेपालया राजीनामा माग यासें अध्यक्ष खनालयात ज्ञापनपत्र लःल्हायेवं आइतवाः थःगु हे निवास डल्लुइ पत्रकार सम्मेलन यानादिसें खनालं दक्वं खँ प्याकेजय् सहमति यायेमाःगु धयादिल । वय्कलं सहमतिया माध्यमं हे समाधान मालेफइगुलिं माओवादीयात आन्दोलन त्वःता सहमतिलय् वयेत इनाप यानादिल ।
थौं छुं नं नेतां जि थ्व थासय् मथ्यंकं समस्या समाधान जुइमखु धकाः दम्भ क्यना समस्या समाधान मजुइगु धयादिसें खनालं झीसं राष्ट्रिय सहमतिया हे आधारय् नेतृत्व निर्माण यायेमाःगु धयादिल ।
वय्कलं उपाध्यक्ष गौतम लगायत खुइम्ह नेतातय्सं लःल्हाःगु ज्ञापनपत्रया भावन ठीक जुसां तरिक गलत जूगु धयादिल । वय्कलं ज्ञापनपत्रया भावना व दक्वं एमालेया चाहनाय् छुं फरक मदुगु धयादिसें उगु ज्ञापनपत्र इमेल मार्फत वःगुलिं तरिका सहि मजूगु धयादिल ।
उखे एमालेया वरिष्ठ नेता केपी ओलीं छगू निजी टेलिभिजन च्यानल नाप खँल्हाबंला यानादिसें प्रधानमन्त्रीया राजीनामा फ्वंपिं खुइम्ह नेतातय् पार्टीं कारवाही ययोगु ख्याच्वः बियादीगु दु । वय्कलं थ्व षड्यन्त्रकारी गतिविधिया उपज जूगु धयादिसें थंज्याःगु गतिविधियात इलय् हे भिंकेमाःगु मखुसाः कारवाही जुइगु धयादीगु दु ।
