१२ कक्षाया जाँच स्थगित

उच्च माध्यमिक शिक्षा परिषदं १२ कक्षाया जाँच स्थगित याःगु दु । एकीकृत नेकपा माओवादी आन्दोलनया कारणं देय्या थीथी थासय् जाँच जुइमफुगु धासें अनिश्चिताकालया निंतिं जाँच स्थगित याःगु दु । अथेहे आन्दोलनया कारणं थीथी थासय् जुइमफुगु जाँच व जाँच बीवनेमफुपिनि निंतिं लिपा हानं जाँचया व्यवस्था याइगु खँ धाःगु दु ।


थ्वस्वयां न्ह्य: माओवादीं याःगु आम हड्तालया कारणं देय्न्यंक न्ह्यानाच्वंगु १२ कक्षाया जाँच प्रभावित जूगु ख: । शनिवा: व आइतवा: बन्दया त्रासं आपालं थासय् जाँच रद्ध जूगु खसाः छुं छुं परिक्षा केन्द्रय् जक जाँच संचालन जूगु ख: ।

थौं हे माओवादी भातृ संगठन अखिल (क्रान्तिकारीं) संचालन जुयाच्वंगु १२ कक्षाया जाँच स्थगित यायेत उच्च माध्यममिक शिक्षा परिषदयात इनाप याःगु ख: । क्रान्तिकारीं छगू विज्ञप्ति पिथना जाँचया निंतिं अनुकुल अवस्था मदुगु धासें जाँच स्थगित यायेत इनाप याःगु ख: । आपालं विद्यार्थीत आन्दोनलय् केन्द्रीत जूगु व आन्दोलनया अवस्थाय् विद्यार्थीया मनोविज्ञान जाँचया निंतिं सहज मजुइगु खँ नं विज्ञप्ति न्ह्यथंनातःगु दु ।